Алтынньы 5 күнүгэр Национальнай художественнай мусуойга «Величественная река Лена» социальнай бырайыак чэрчитинэн, «Кэрэ эйгэтигэр» диэн дьоро киэһэ тосхойдо.
Бу күн Өлүөнэ өрүһү холустаҕа үйэтиппит оҕолор уонна улахан дьон кыттыгас ойууларын быыстапката тэрилиннэ. Ити уруһуйдарга аукцион биллэриллэн, киирбит харчы барыта оҕоҕо аналлаах бырайыактарга көмө быһыытынан ананна.
Н.Е. Мординов-Амма Аччыгыйа аатынан «Кэскил» оҕо бэчээтин кыһатын дириэктэрэ А.Е. Андреева «Берегиня» киин иитиллээччитэ Уйгулаана Герасимованы кытта гуашь көмөтүнэн уруһуйдаабыттар.
– Биир күн Табаҕаҕа, Өлүөнэ өрүһү уруһуйдаары, анаан-минээн барбыппыт. Мин болҕомтобун Уйгулаана кыыс тута тарпыта. Мин, уруһуйдууру таһыччы умнубут киһи, кини угуйан, ардыгар сүбэлээн, Өлүөнэ эбэбитин иккиэн тапсан ойуулаабыппыт. Ханнык өҥү, дьүһүнү талары сүбэлэһэн, икки чаас бэрт түргэнник элэстэнэн ааспыта. Уруһуй диэн киһини уоскутар, абылыыр күүстээҕин итэҕэйдим. Оттон кырачаан саҥа доҕорбун Уйгулаананы, кини ситиһиилэрин, олоҕун-дьаһаҕын интэриэһиргиир буоллум, – диир Анжелика Егоровна.
Аукцион кэмигэр амарах санаалаах дьон «Кэскил», «Юность Севера», «Чуораанчык», «Колокольчик» сурунаалларга сурутууну бэлэхтээтилэр. Ол курдук, «Берегиня» киин попечителлэрин сүбэтин чилиэнэ, куорат Думатын общественнай палаататын чилиэнэ Альбина Лыхина Пригороднайга олорор Павловтарга, «Алмазэргиэнбанк» үлэһиттэрэ М.И. Слепцова, С.В. Винокурова Дьокуускайга олохтоох Проценко дьиэ кэргэнигэр, Тулагыга олохтоох А.А. Аммосоваҕа, «Берегиня» дириэктэрэ Л.П. Ефремова, сүрүн бухгалтера Т.Н. Спиридонова, отдел начаалынньыга Н.С. Захарова Мархаҕа 16 оҕолоох А.Н. Катагароваҕа, Тиксиигэ олохтоох Л.С. Гороховаҕа, Тулагыга биэс оҕолоох П.И. Корниловаҕа, Н.А. Корякина Дьокуускайга биэс оҕону иитэр О.И. Тимофееваҕа, Гагаринскай уокурук баһылыга Руслан Платонов (биһиги урукку эдкорбут – аапт.) Орто Халыма Эбээҕэр олорор М.А. Винокуроваҕа, куорат дьаһалтатыттан Георгий Михайлов Намҥа Н.Н. Саввинаҕа, «Подросток» эппиэттээх үлэһитэ Александра Антонова Горнай улууһун Мытааҕар олорор Т.А. Петроваҕа оҕо хаһыаттарын, сурунаалларын анаатылар.
2018 сылга саҥа ааҕааччы эбилиннэ диэн биһиги үөрэбит, ааҕыыны көҕүлүүр амарах санаалаах дьоҥҥо барҕа махталбытын биллэрэбит.
Ж. СОЛОВЬЕВА.