Орто Халыма улууһун Өлөөкө-Күөл орто оскуолатыгар улуустааҕы IX «Винокуровскай ааҕыылар» ыытылыннылар. Бу научнай-практическай конференцияҕа биһиги оскуолабыт бочуоттаах выпускнига, тыа хаһаайыстыбатын наукатын доктора, профессор, Аан дойдутааҕы Хотугу форум академиятын уонна аграрнай үөрэхтээһин Аан дойдутааҕы академиятын академига, РФ суруналыыстарын сойууһун чилиэнэ, Российскай Академия үөрэхтээһинин уонна наукатын үтүөлээх үлэһитэ, СР тыатын хаһаайыстыбатын үтүөлээх үлэһитэ, Орто Халыма улууһун бочуоттаах гражданина Иван Николаевич Винокуров сырдык аатыгар ананаллар.
Ыаллыы сытар Сыбаатай орто оскуолатыттан 8 оҕону саха тылын учуутала Марианна Васильевна Колесова уонна оскуола психолога Варвара Ивановна Винокурова аҕалан кытыннардылар. Хомойуох иһин, атын оскуолалар араас биричиинэнэн кыттыбатылар. Ол да буоллар, тэрээһин былаан быһыытынан барда.
Чинчийэр үлэлээх 24 оҕо 5 хайысханан арахсан үлэлэрин көмүскээтилэр. Күн иккис аҥарыгар агроскилстарга күрэхтэстилэр. Ол курдук, кус үргээн эттээһиҥҥэ, тоҥ балыгы хатырыктаан «Индигирка» салааты оҥорууга, күөрчэх ытыйыыга, кылтан «Төбө быатын» оҥорууга кыргыттар, оттон куобах сүлүүгэ, илим хотоҕоһун оҥорууга, туһаҕы оҥорууга, тоҥ балыгы хатырыктаан кыһыыга уолаттар илин-кэлин түһүстүлэр.
Бэлиэ күммүт бүтэһигэр түмүктэри истэн баран, тапталлаахтар күннэригэр аналлаах кафелаах дискотеканы 9-ус кылаастар тэрийдилэр. Былааннаммыт тэрээһиммитигэр кэлэн барбыт ыалдьыттарбытыгар истиҥник махтанабыт.
Изабелла Ноговицына, Өлөөкө-Күөл, Орто Халыма.