Аан Дойдутааҕы түмэл күнүгэр анаан Өлөөкө-Күөл кыраайы үөрэтэр түмэлигэр бэртээхэй тэрээһин буолан ааста.
Ол курдук түмэл үлэһитэ Винокурова Ю.С. уонна нэһилиэк библиотекатын үлэһитэ Винокурова А.В. 5-11 кылаас оҕолоругар икки күннээх музей устун квест оонньууну ыыттылар. Оҕолор хамаандаларга арахсан бириэмэҕэ күрэхтэстилэр. Бэриллибит сорудахтар төрөөбүт дойдуларын, дьоннорун, урукку малы-салы, туттар тэрили, олорон ааспыт чаҕылхай дьоммутун төһө биллэрэрин тургутар аналлаахтара.
Оонньуу түмүгэр сыыһаларга, билбэтэх сорудахтарыгар ырытыы оҥоһуллан оҕолор олус интэриэһиргээн, астынан, өссө да маннык тэрээһин ыытылларыгар баҕа санааларын эттилэр. Кыайыылаах хамаандалар хас биирдиилэрэ добун сурук ылан, эриэккэс көстүүлээх тордунан наҕараадаланнылар. Оттон бары кыттыылаахтар туоһу суруктары тутан, минньигэс бэлэхтэри ылан үөрдүлэр.
Музей күнүнэн оҕолор эмиэ илии тутуурдаах тиийэн үлэһиттэри соһуччу үөртүлэр. Ол курдук, Үлэ сылыгар анаан кылааһынан оҥорбут «Үлэ киһини киэргэтэр» диэн эркин хаһыаттарын биэрдилэр. Манна бөһүөлэкпит үлэннэн аатырбыт дьоннорун, мэтээллээх,орденнаах эбэлэрин,эһэлэрин туһунан матырыйааллары хомуйан киллэрбиттэр. Маны таһынан 11 кылаастар ветеран учуутал Колесова А.С. ньирэй иитиитигэр үлэлээбит кэмнэригэр мэтээлинэн наҕараадаламмыт докумуоннарын түмэлгэ туттардылар.
Онон хардарыта байытыһыы буолан ааста диэххэ сөп.
И. Ноговицына, Өлөөкө-Күөл б.