Ыам ыйын 17 күнүгэр Лөгөй орто оскуолатыгар Пионерия 100 сылыгар аналлаах улууска ыытыллар дэкээдэ иһинэн «Салют, Пионерия!» диэн Пионерия бэтэрээннэрин уонна оҕо хамсааһынын актыбыыстарын слета ыытылынна.
Слекка пионерскай барабаан, знамя доҕуһуолунан арыаллатан Лөгөй орто оскуолатын учууталларын этэрээтэ, 60-70 сыллардааҕы пионердар этэрээттэрэ, улуустааҕы пионербаһаатайдар ассоциацияларын этэрээтэ (сал. Павлова Л.С.) пионерскай речевкалаах, ырыалаах хааман киирэн рапорт туттарбыттара урукку кэми санатта.
Салгыы Лөгөй орто оскуолатын «Кэскил» оҕо хамсааһынын төлөннөөх пионерскай эҕэрдэлэрэ уонна 60-70-с сыллардааҕы пионердар кыттыылара олус долгутуулаах буолла.
Пионербаһаатайдар ассоциацияларын чилиэнэ, 80-с сыллардааҕы Дүпсүн орто оскуолатын пионербаһаатайа, коллекционер А.М. Федорова бэйэтин коллекциятыттан пионерскай значоктары, Бүтүн Союзтааҕы «Артек» пионерскай лааҕыр путевкатын көрдөрбүтэ, билиһиннэрбитэ мустубут дьон сэҥээриитин ылла.
«Өркөн» оҕону эбии үөрэхтээһин киинин методиһа Е.П. Ушницкая улууска пионерскай хамсааһын историятыттан уонна Пионерия 100 сылыгар ыытыллыбыт тэрээһиннэри билиһиннэрдэ. Улуустааҕы пионербаһаатайдар ассоциацияларын салайааччыта Л.С. Павлова олус долгуйан туран оҕо общественнай түмсүүтүн улууска түмпүт М.Г. Колесова, Лөгөй орто оскуолатыгар өр кэмҥэ үрдүк таһаарыылаахтык пионербаһаатайынан үлэлээбит М.И. Стрекаловская ааттарын ахтан аһарда, кинилэр ааттарынан киэн туттарын бэлиэтээтэ. Пионербаһаатайдар ассоциацияларын үлэтин-хамнаһын билиһиннэрдэ.
Салгыы Лөгөй орто оскуолатыгар өр кэмҥэ пионербаһаатайынан, директоры иитэр үлэҕэ солбуйааччынан үлэлээбит, билигин да оҕо түмсүүтүн салайааччытынан үлэлии сылдьар Т.М. Петухова педагогическай үлэ бэтэрээнэ, СР үөрэхтээһин систематын Бочуоттаах бэтэрээнэ, СР үөрэҕириитин туйгуна, СР пионерскай хамсааһын бэтэрээнэ Клара Афанасьевна Неустроева аатынан Бочуот кинигэтигэр киллэрилиннэ.
Оскуола музейыгар пионерскай барабааннар, октябрятскай, пионерскай, комсомольскай знамялар, 70-80-с сыллардааҕы пионерскай этэрээттэр отчет-рапортара, «Тыҥ хатыыта» эдэр кэрэспэдьиэннэр постарын 70-80-сс сыллардааҕы «Бэлэм буол» хаһыакка тахсыбыт матырыйааллара кичэллээхтик хараллан тураллара олус үөрдэр.
Изабелла Аманатова
«Өркөн» оҕону эбии үөрэхтээһин киинин педагога,
Уус-Алдан.
Источник: keskil14.ru
Лөгөйгө Пионерия бэтэрээннэрин уонна оҕо хамсааһынын актыбыыстарын слета