Алтынньы 22 күнүгэр Лөгөй нэһилиэгин аҕа баһылыгар Николай Николаевич Поповка ыалдьыттаатыбыт. Быйылгы сыл түмүктэрин уонна кэлэр сыл былаанын сырдатта.
— Быйыл 2025 сылга биһиги нэһилиэкпитигэр туох улахан ситиһии баарый? Туох саҥа эбийиэктэр тутулуннулар?
Үтүө күнүнэн убаастабыллаах юнкордар! Быйыл Лөгөй нэһилиэгин киин бөһүөлэгэр Кэптэнигэ 39 квартиралаах түөрт этээстээх саҥа таас дьиэ үлэҕэ киирдэ. Ыаллар атырдьах ыйыгар күлүүстэрин тутаннар, квартираларын оҥостоннор киирэн олороллор. Бу күннэргэ саҥа таас дьиэбит үөрүүлээх арыллыыта буолуохтаах. Маны тэҥэ, дэриэбинэбит иһигэр туора уулуссаларга өрөмүөн үлэтэ ыытыллан щебенка куттубут. Мантан иннэ нэһилиэк иһинээҕи суолларга үлэлэр ыытыллыахтара.
— Кэптэнигэ уопсайа киин ититиигэ хас дьиэ, тэрилтэ холбонон олороруй?
Биһиги нэһилиэкпит үс бөһүөлэктээх 370 дьиэттэн 106 дьиэ холбонон олороллор, ол курдук . Кэптэни Центральнай хочуолунайыгар 5 оһох үлэлии турар уопсай кыамтата 8.75 МВт. Балыыһа хочуолунайыгар 3 оһох үлэлии турар, уопсай кыамтата 3.02 МВт. Быйыл эбии 5 ыал итиитиигэ холбонно. Хомустааха биир улахан хочуолунай 3 оһох үлэлиир уопсайа 3.75 МВт., Хомустаахха былырыын саҥа хочуолунайтан саҥа теплотрасса тардыллан биэс ыал холбоммута, маны таһынан оскуола холбоммута. Эрдэ холбоммут дьиэлэри эмиэ саҥа хочуолунайга холбообуппут. Даалы подземнай хочуолунайыгар икки оһох үлэлиир, биир оһох кыамтата 0.3 уопсайа 0.6 МВт. Уопсайа школа-сад уонна Лөгөй нэһилиэгин соҕотох геройун Анастасия Семеновна Копырина аатынан кулууп дьиэтэ уонна икки чааһынай дьиэ ититиигэ холбонон тураллар.
— От үүнүүтэ быйыл биһиги нэһилиэкпитигэр хайдаҕый?
Биһиэхэ былааҥҥа 2100 тонна диэн, бары былааны толору оттоотубут.
— Быйыл биһиги бөһүөлэкпитигэр саҥа туох специалистар, үлэһиттэр кэлэн үлэлии сылдьалларый?
Быйыл биһиэхэ Түүлээхтэн саҥа бокса тренера дьиэ кэргэнин кытта көһөн кэллилэр уонна балыыһабытыгар фельдшер уонна сиэстэрэ үлэһиттэрэ кэллилэр. Маны тэҥэ, Лөгөй лиссиэй-интэрнээтигэр саҥа музыка учуутала кэлэн үлэлэрин саҕалаатылар.
— Кэлэр сылга Лөгөй нэһилиэгэр туох үлэ ыытыллар?
Кэлэр сылга үлэ былаана нэһилиэк бюджетыттан тутулуктаах. Биһиги 2015 сылтан спорт саалата суох олоробут, бу нэһилиэккэ улахан охсуулаах буолар. Билигин саҥа спорт саалатын бырайыага оҥоһуллан экспертизаҕа барбыта. Бу барйыакпытыгар сөбүлэҥэ кэллэ даҕаны саҥа спорт саалатын тутуллуутугар бары өттүттэн үлэлэһэн үп-харчы көрөн, бырабыыталыстыбаны кытта үлэһэн олоххо киирэрэ буоллар диэн баҕа санаалахпыт.
Аҕа баһылыкпытыгар Николай Николаевичка махтанабыт!
Кэпсэтиини ыытта: Янис СЫСОЛЯТИН,
хаартыскаҕа түһэрдэ: Дима НАФАНАИЛОВ, SiTiM LegMedia юнкордара