Тохсунньу 30-31 уонна олунньу 1 күннэригэр Өрөспүүбүлүкэтээҕи оҕолорго аналлаах «Лөгөй мадьынылара» күрэс киэҥ хабааннаахтык уонна үрдүк таһымнаахтык Кэптэни бөһүөлэгин Лөгөй лиссиэй-интэринээтигэр ыытыллан түмүктэннэ.
Ол курдук, быйылгы күрэҕи «Рутуб» сыһыарыы быһа холбонуутугар 10 тыһыынчаттан тахса көрөөччү көрдө. Уопсайа 14 улуустан уонна Дьокуускай куораттан 457 уолан күөн көрүстэ. Хас биирдии күрэс судьуйата суох ыытыллыбат, ол курдук күрэс сүрүн судьуйата — Ким Владимирович Бубякин. “Лөгөй мадьынылара” үөрүүлээх арыллыытыгар СӨ Бырабыытыластыбатын Бэрэссэдээтэлин солбуйааччы Сергей Васильевич Местников, Уус Алдан улууһун аҕа баһылыга Василий Петрович Алексеев, Лөгөй нэһилиэгин баһылыга Николай Николаевич Попов, Лөгөй лиссиэй-интэринээтин дириэктэрэ Михаил Петрович Пухов уонна “Лөгөй мадьыныларын” күрэх төрүттээччитэ Петр Николаевич Перевалов бары кыттааччыларга эҕэрдэ, махтал тылларын салайааччыларга уонна тэрийээччилэргэ анаатылар. Быйылгы күрэх өрөспүүбүлүкэ араас улуустарыттан элбэх кыттааччыны, мас тардыһыытынан утумнаахтык дьарыктанар оҕолору, салайааччылары түмтэ диэн бэлиэтээн аастылар. Бу күрэс үрдүк таһымнаах ыытылларыгар уонна кыайыылаахтарга бириистэри үбүлээбит биир дойдулаахтарбытыгар, дойдуларын туһугар үлэлии-хамныы сылдьар бар дьоммутугар улахан махталбытын биллэрэбит диэн эттилэр.
Ыһыылаах-хаһыылаах, икки күннээх тыҥааһыннаах киирсии кэнниттэн хамаанданан маннык түмүк таҕыста:
III миэстэ — ДЮСШ 1 хамаандата
II миэстэ — Ытык Күөл хамаандата
I миэстэ — Горнай хамаандата
Өбүгэбит төрүт үгэһин мас тардыыһытын көрүҥүн сэҥээрээччилэригэр, салҕааччыларыгар «Лөгөй мадьынылара» күрэс ситииһиилээхтик түмүктэммитинэн итии-истиҥ эҕэрдэ!
«ЛӨГӨЙ МАДЬЫНЫЛАРА» күрэх түгэннэриттэн фоторепортаж көрүҥ:
Янис СЫСОЛЯТИН, VIII кылаас
Лөгөй лиссиэй-интэринээт «LegMedia» юнкора
Видеолары таҥан оҥордулар: Саскылаана МАЛЫШЕВА, Валя БУРНАШЕВА, Лөгөй лиссиэй-интэринээт юнкордара
Хаартыскаҕа түһэрдэ: Николай МАЛЫШЕВ, Х кылаас
Лөгөй лиссиэй-интэринээт «LegMedia” юнкора