Сылын ахсын ыытыллар үтүө үгэскэ кубулуйбут, үгүс оҕо-аймах кутун-сүрүн туппут саамай күүтүүлээх бырааһынньыкпыт «Костёр: оҕо саас кутаатаата» Кэптэнибит ытык сиригэр Остуолбалаах алааска ыам ыйын 17 күнүгэр үрдүк таһымҥа ыытыллан дьон-сэргэ үөрүүтэ үксээтэ.
Бырайыак пионерия саҕаттан биһиги оскуолабытыгар ыытыллар буолан, быйыл Улуу Кыайыы 80 сылыгар, Уус-Алдан улууһугар «Пионерия» оҕо хамсааһына тэриллибитэ 100 сылыгар ананар. Онон биһиэхэ бэлиэ сыл буолан, лиссиэйбит кылаас коллективтара, чугас сытар бөһүөлэктэр оскуолаларыттан биирдии кылааһы ыҥыран тэрээһиммит олус киэҥ хабааннаахтык ыытылынна. Ол курдук, ыҥырыы суруктары тутан ыалдьыттаан үөрэн-көтөн аастылар: Суотту, Уһун-күөл орто оскуолалара.
Алаас саҕатыгар биирдии кылаас сирин-уотун оҥостон айылҕаҕа сынньанар, эбиэттиир. Күн устата алааспыт араас муннуктарынан оонньуу площадкалара, квест, станцияларынан оонньуулар эти-хааны чэбдигирдэр
«Веселые старты», «Зарница» күрэхтэр буолан аастылар. Хас оонньуу кыайыылаахтар ааттара дуораһыйа ааттанна.
Маны тэҥэ, «Костёр оҕо саас кутаата-2025» тэрээһиммит чэрчитинэн, нэдиэлэ устата видео таҥыытын күрэҕэ, Улуу Аҕа дойду сэриитин историятын, Уус- Алдан пионериятын тула оҕолорго викторина тэриллиннилэр. Кыайыылаахтар Сэрии кыттыылаахтарын Павлов Семен Гаврильевич Иосифов Егор Николаевич , Борисов Константин Константинович оҕолоруттан сиэннэриттэн анал премиялары тутан үөрүүлэрэ үксээтэ.
Тэрээһиммит күүтүүлээх чааһа-бырааһынньыктааҕы салют буолар. Аламай күөх халлааҥҥа араас өҥүнэн оонньуур салют, оҕо саас дьоллоох түгэнин бэлэхтээтэ.
Бары тэрийээччилэргэ, лиссиэйбит коллективыгар бу күнү бэлэхтээбиккитигэр барҕа махтал! Ыҥырыы тутан кэлбит ыалдьыттарга биһигини кытта тэҥҥэ үөрүүбүтүн үллэстибиккитинэн астына саныыбыт.
Ыалдьыттар, оҕолор бука бары үөрэн-көтөн тарҕастылар.
Оскуола сыллара уруоктар эрэ буолбакка, дьону-сэргэни кытта алтыһар чаҕылхай түгэннэрин санатан, итиини, үөрүүнү, сылаас иэйиини бэлэхтиир.
Оскуола кутаа уота куруук өйөбүл күүс буолар, доҕордоһуу бэлиэтэ биир сомоҕо гына түмэр!
Янис СЫСОЛЯТИН, Лөгөй лиссиэй-интэринээт «SiTiM LegMedia» юнкора