Өрөспүүбүлүкэбит Ил Дарханын харыйатыгар сыл аайы өрөспүүбүлүкэ араас муннуктарыттан бастыҥтан бастыҥнар мусталлар. Манна оскуола Лидердара, бастыҥ үөрэнээччилэр, араас таһымнаах куонкурустар кыайыылаахтара, спортсменнар кэлэн сыл биир күүтүүлээх тэрээһинигэр кытталлар. Биһиги оскуолабытыттан сыл аайы хастыы да оҕо барар буолан биһиги үөрүүбүт, киэн туттуубут улахан. Ол курдук, былырыыҥҥы тэрээһиҥҥэ лиссиэйтэн 5 үөрэнээччи ыҥырыллыбыт буоллаҕына быйыл 4 уол барар буолла. Биһиги ситиһиилээх оҕолор кылаастарын салайааччыларын көрсөн кэпсэттибит, уолаттар ситиһиилэрин билистибит.
Василий Васильевич Бережнев, история уонна обществознание учуутала, 11 «А» кылаас салайааччыта:
Биһиги кылаастан Ил Дархан харыйатын делегата — Антон Тищенко. Антон оҕо эрдэҕиттэн олус актыыбынай позициялаах, спортка ордук волейбол көрүҥүнэн сөбүлээн дьарыктанар. ОБЖ, технология предметтэригэр улуус, республика уонна Россия таһымыгар ситиһиилээхтик кыттар. Технология олимпиадатыгар республика этабыгар кыайан, Бүтүн Арассыыйатааҕы Түмүктүүр этапка Москва куоракка баран ситиһиилээхтик кыттан кэлбитэ. «Профессионалы» күрэх «Столярное дело» уонна «Кровельные работы» улуустааҕы уонна республикатааҕы этаптарын призердара уонна кыайыылааҕа. Антон 2023 сыллаахха «Профессионалы» Бүтүн Арассыыйатааҕы, Москва куоракка, Түмүктүүр этабыгар 3 миэстэ буолбута. Оҕо сылдьан боксанан утумнаахтык дьарыктанан эмиэ Московскай уобалас Люберцы куоракка баран ситиһиилээхтик кыттан кэлбитэ. Иллэҥ кэмигэр ыллыыр, гитараҕа, синтезаторга оонньуур. Сылын аайы «Инникигэ хардыы», «Молодежь. Наука. Бизнес» научно-практическай кэмпириэнсийэлэргэ утумнаахтык кыттар, быйыл улууска 1 истипиэннээх дипломун хаһаайына буолан республикаҕа кыттар ыҥырыыны ылла. Бэйэтэ кыра эрдэҕиттэн ыллаан, ункуулээн бэйэтэ олус творческай киһи буолар. Сыл түмүгүнэн «Үрдэл» ситиһии түһүлгэтигэр «Бастыҥ үөрэнээччи» аат хаһаайына
— диэн 11 «А» кылааһын салайааччыта Бережнев Василий Васильевич сырдатта.
Салҕыы биһиги лиссиэйбытыттан барар оҕолор тустарынан 11 «Б» кылаас салайааччыта, лицей директорын иитэр үлэҕэ советнига Татьяна Михайловна Петухова билиһиннэрдэ
Ил Дархан харыйатын делегата — Арылхан Перевалов
Арылхан Перевалов — Лөгөй лиссиэй интэринээтин 11 «Б» кылааһын үөрэнээччитэ. Арылхан оҕо эрдэҕиттэн спордунан утумнаахтык дьарыктанар. Кини оскуолабыт актыбыыһа. Дорҕоонноох хоһоон ааҕааччы, кыра кылаастарга улууска «Эрчим ааҕыылара» хоһоон күрэҕэр Гран-при хаһаайына. Иллэҥ кэмигэр ырыанан, үҥкүүнэн сөбүлээн дьарыктанар. Ордук мас тардыһыынан сөбүлээн, сорук туруорунан дьарыктанар. Ону тэҥэ многоборьенан, республикаҕа элбэх төгүллээх чемпион, улуус мас тардыһыытын сборнайын чилиэнэ. «Движение Первых» иһинэн ыытыллар юноармия бырайыакка кыра кылаастан хамандыырынан сылдьар. Сыл түмүгүнэн «Үрдэл» ситиһии түһүлгэтигэр «Бастыҥ спортсмен» аат хаһаайына.
Ил Дархан харыйатын делегата — Радомир Федоров
Радомир Фёдоров 11 «Б» кылаас үөрэнээччитэ. Биһиги лиссиэйбит биир бастыҥ спортсмена, ат сүүрдүүтүн спордунан ситиһиилээхтик дьарыктанар. Оҕо эрдэҕиттэн, эһэтин кытта, сылгы иитиитинэн дьарыгырар. Кини бэйэтин баҕатынан ат баайар, сүүрдэр, ааттаах-суоллаах жокей буолар. Кыра эрдэҕиттэн улуус, өрөспүүбүлүкэ күрэхтэригэр кыттан кыайыыта үгүс. Республика таһымыҥар тахсан, 2023 сыллаахха «Лучший жокей» диэн номинация хаһаайына буолбута. Бэйэтэ иитэн таһаарбыт сүүрүк боруода «Кыымчаана» диэн аттаах. Маны таһынан, мас тардыһыытынан дьарыктанар, хас да төгүл чемпион аатын сүкпүтэ. Республиканскай «Ыллаа-туой уол-оҕо» хас да төгүллээх Лаурета.
Ил Дархан харыйатын делегата — Дариан Федоров
Дариан Федоров 11 «Б» кылаас үөрээччитэ, кыра оҕо эрдэҕиттэн ырыанан дьарактанан, республиканскай, улуснай ырыа күрэхтэрин кыттыылааҕа, дипломана, Лауреата. Научно-практическай конференцияларга баскетбол, мас тардыһыы успуордун темаларыгар үлэлэрдээх, кэккэ ситиһиилэрдээх. Дариан мас тардыһыынан, баскетболунан дьарыктанар, араас таһымнаах күрэхтэр кыайыылаахтара. «Велопробег» патриотическай хайысхалаах бастакы хамсааһын кыттыылааҕа. 2014 сылтан «Ыллаа-туой оҕо» Республиканскай куонкуруска утумнаахтык кыттан, бөлөҕүнэн уонна биирдиилээн кыттыыга Лауреат уонна дипломан аатын үгүстүк ылбыта. «Эрчим» уолаттар ааҕыыларын куонкуруһун хас да төгүллээх Гран при хаһаайына, араас уус уран самодеятельность куонкурустарын кытыылааҕа, лауреата. «Үрдэл» ситиһии түһүлгэтин «Сыл бастыҥ спортсмена» аат хаһаайына.
Уолаттарым Улуу Кыайыы 80 сылыгар аналлаах «Аллея Героев» бырайыак ааптардара буолаллар. Бырайыакпыт улуус, илин эҥэр оскуолаларын үөрэнээччилэригэр киэҥ өйөбүлү, биһирэбили ыллылар.
Бу курдук, биһиги лиссиэй сыл аайы ыҥырыллар оҕо ахсаанынан эрэ элбэх буолбакка, көрдөрүү ситиһии үгүһүнэн ыҥырыллан барар үөрэнээччилэрбититтэн олус үөрэбит, киэн туттабыт!
Янис Сысолятин, Павел Герасимов, Мария Тищенко «SiTiM LegMedia» юнкордара