Кулун тутар 6 күнүгэр Горнай улууһун Сэмэн Петрович Данилов аатынан Бэрдьигэстээх орто оскуолатыгар «Кыыс Куо» диэн кыргыттарга аналлаах тэрээһин ыытылынна. Бу тэрээһин истиҥ, иһирэх, сылаас сыһыаны, үлэҕэ тапталы үөскэтиигэ, кэрэ аҥаардар уопсастыбаҕа оруолларыгар, айар дьоҕурдарын сайыннарыыга уонна бэйэ бэйэҕэ ытыктабыллаахтык сыһыаннаһыыга туһаайыллан иккис сылын ыытыллар.
5-10-с кылаас кыргыттара сүүмэрдэммит 10 хамаандаҕа арахсаннар, күн устата араас хабааннаах күрэстэргэ, маастар-кылаастарга уонна оонньууларга кытыннылар. Кинилэргэ сүбэ-ама, көмө буоларга модератордар сыһыарыллыбыттара.
Күн саҕаланыыта кыргыттар хамаанданан оскуоланы кэрийэ сылдьан квест аастылар. Бу квестпытын «Күбэйэ Куо» диэн ааттаатыбыт. Квест хамаанда хомулларыгар, бэйэ бэйэлэрин кытта билсэллэригэр диэн сыаллаах-соруктаах. Сорудахтарын толордохторун аайы маршрутнай илиискэ баал туруортараллар. Квест кэннэ кыргыттар айар дьоҕурдарын сайыннарарга эҕэрдэ суруктары (открыткалары) оҥордулар. Бу күрэс «Айаана Куо” диэн ааттаах-суоллаах. Өҥнөөх кумааҕылары, фломастердары туһанан, аппликациялаан оҥорбут олус кыраһыабай открыткаларын бэтэрээн учууталларбытыгар бэлэх быһыытынан ууннубут.
Салгыы үһүс түһүмэҕинэн кыргыттарбыт ас астыыр дьоҕурдарын, сатабылларын сайыннарарга “Сандалы Куо” диэн остуол киэргэтиитигэр уонна ас астааһыҥҥа күрэс буолла. Манна хамаандалар икки бүлүүдэни — салаат биир көрүҥүн уонна десерты – ону тэҥэ, утах бэлэмниэхтээхтэр уонна остуолларын этикет быраабылатын тутуһаннар симиэхтээхтэр. Манна оҕуруот аһыттан, фруктаттан салааттары, дьон сөбүлээн сиир Цезарь салааты, минньигэс тортары, онтон да атыны Дьүүллүүр Сүбэҕэ амсаттылар.
Тэрээһин биир чаҕылхай түгэнинэн «Кэрэчээнэ Куо» диэн ааттаах маастар-кылаастар буоллулар. Профессиональнай визажист, блогер Айгылаана Андреева күннээҕи макияжка уонна Саргылана Васильева бүрүчүөскэ оҥосторго сүбэ-ама биэрдилэр, үөрэттилэр. Тэрээһин түмүгэр кыргыттар күн устата оҥорбут сатабылларын көрдөрөргө видеонан бэйэни билиһиннэрдилэр уонна викторинаҕа оонньоотулар.
Хас биирдии хамаанда ураты көрүүлээҕин, түмсүүлээҕин уонна көхтөөҕүн көрдөрдө. Бүгүн хотторбут хамаанда диэн суох. Түмүккэ бары кыайыылаах буолан таҕыстылар. Дьүүллүүр Сүбэ бары хамаандаларга минньигэс бэлэх уонна туоһу сурук туттартаата. Кэрэчээн кыргыттарбыт күннэрин олус туһалаахтык атаардыбыт.
«Сайдам» медиа-киин эдэр кэрэспэдьиэннэрэ, Горнай