Оҕолоор, Сахабыт сирэ үгүс да кыыллардаах. Ол кыыл барыта тус-туспа сылдьар сирдээх, аһыыр астаах, кыракый оҕолордоох. Бары олус уратылар, ол эрэн кинилэр эйэлээхтик кэккэлэһэ олороллор.
Галина Власьевна Ильина, Оҕо ааҕыытын киинэ, бибилэтиэкэр, Дьокуускай.
Айылҕаҕа баар ойуур кыылларын туһунан хоһооннору ааҕыҥ, сэргээҥ!
Бөрө
Петр Одорусов
Бөрө
Аччыктыыбын, тоҥобун,
Аска адьас топпоппун.
Үөр табаҕа үөмэбин,
Сиэтэхпинэ үөрэбин.
Калистрат Еремеев.
Бөрө
Көһүнэн сири
Өксөһүйэ сүүрэр,
Аһылыгар сиири
Хайаан да ситэр.
Сылгыны, табаны
Ыраахтан чуҥнуур,
Кыамматы, кыраны,
Тутан бултуур.
Адьырҕа бөрө
Аччыктаан улуйар,
Тыалга, тымныыга
Таһырдьа утуйар.
Иннокентий Эртюков
Бөрө
Сиэхпин-аһыахпын баҕараммын
Сиксиллэ сиэлэн иһэбин,
Тугу булан, ханна бараммын
Бүгүн үссэнэ түһэбин.
Субуруйар сур бөрөбүн,
Уҥа-хаҥас туой көрөбүн.
Саһыл
Калистрат Еремеев.
Саһыл
Сэрэҕинэн биллибит,
Албынынан аатырбыт,
Саһылчааммыт сыбдыйар,
Сүтэ-көстө ньыкыйар.
Ыарҕалары кэрийэр,
Куобахчааны үргүтэр,
Иҥсэтигэр салбанар,
Иһэ тотон саланар.
Түүтүн өҥүн оҥостор,
Толбоннура субуллар,
Булчут суорун сэрэйэр
Ырааҕынан эргийэр.
Суолун-ииһин муннарар
Хороонугар кирийэр,
Халаачыктыы эриллэр,
Сымнаҕатык утуйар.
Иннокентий Эртюков
Саһыл
Тула өттүбүн көрүнэбин,
Туохтан эрэ дьиксинэбин,
Ойуур тыалары кэрийэбин,
Оннук аһыыр булунабын.
Сатабыллаах киһибин –
Саһылыкаан мэйиибин.
