Уһук Хоту Усуйаана улууһун Хаһааччыйа орто оскуолатыгар 2012 сыллаахтан дьүкээгир омук төрүт культуратын, тылын, литературатын үөрэтэр «Эдьил Йаwул («Школа жизни») бырайыак ситиһиилээхтик үлэлиир.
Бу бырайыак чэрчитинэн «Йанги» диэн үҥкүү бөлөҕө тэриллэн үлэлээбитэ номнуо 10 сыл буолла. Оҕолору үҥкүүгэ уһуйар салайааччылара — Дохунаева Лаурика Евгеньевна, омук тылын учуутала, оскуолаҕа үөрэх чааһыгар дириэктэри солбуйааччы. Айылҕаттан талааннаах үҥкүүһүт Лаурика Евгеньевна үҥкүүгэ уһуйбут кырачаан оҕолоро быйыл 10, 9 кылаас буола улааттылар.
«Йанги» оҕолоро сылын аайы Бүтүн Арассыыйа, өрөспүүбүлүкэ, улуус таһымнаах араас күрэхтэһиилэргэ ситиһиилээхтик кытталлар.
Ол курдук, саҥа үүммүт 2024 сыл саҕаланыытыгар Китай наруодунай демократическай өрөспүүбүлүкэтигэр Удаляньчи куоракка I аан дойдутааҕы Китай- Россия «Плечом к плечу» фестивалыгар ситиһиилээхтик кыттан кэллилэр. Бу улахан таһымнаах күрэхтэһиигэ 600 тэн тахса оҕо, эдэр ыччат кыттыыны ылбыт.
Оҕолор улахан сценаҕа аан бастаан тахсан, олус долгуйбуттар. Көрөөччүлэр дохсун ытыс тыаһынан арыаллаан үөрдүбүттэр, оҕолорбут үҥкүүлэрин, талааннарын көрөн олус сөхпүттэр, сөбүлээбиттэр. Дьүүллүүр сүбэ түмүгүнэн «Йанги» үҥкүү бөлөҕө I степеннээх лауреат буоллулар.
Ситиһии кынаттаах аартыккыт алгыстаах буоллун, айар үлэҕит уота өссө күүскэ саҕыллан. үрдүктэн үрдүк чыпчаалларга, саҥа саҕахтарга угуйа-ыҥыра туруохтун! «Йанги» оҕолоро уонна салайааччы Дохунаева Л. Е. Саҥа дьылынан Китай сиригэр айанныыр бырайыастарын төлөөбүт, улахан сыанаҕа тахсар таҥастарын-саптарын барытын тэрийбит күндү төрөппүттэргэ, Китай сиригэр — уотугар тэҥҥэ арыаллаабыт, көмөлөспүт күн күбэй ийэлэргэ Слепцова Алия Вячеславовнаҕа, Горохова Прасковья Дмитриевнаҕа, Хаһааччыйа орто оскуолатын директорыгар Окорокова М.С махтаналлар.
Хотугу норуот историятын, төрүт култууратын утумнаахтык үөрэтэр, оҕо айар талаанын, дьоҕурун сайыннарар үлэни мэлдьи көҕүлээн ыытар Хаһааччыйа орто оскуолатын учууталларын, оскуола дириэктэрэ Маргарита Степановнаны саҥа үүммүт сылга улахан түһүлгэҕэ кыттан, лауреат үрдүк аатын ылбыккытынан истиҥник эҕэрдэлиибит.
Розалия Горохова, Хаһааччыйа, Усуйаана