Алтынньы – кыстык аҕыс ыйыттан бастакыта, күһүҥҥү иккис кэрэ ый. Кини аата алта сыыппараны кытта ситимнээх, оттон алта – алтыһыы, ситимнэһии бэлиэтэ. Ол иһин бу ыйга ый-күн, сулустар (Үргэллэрдиин, Чолбоннуун) алтыһаллар, дьон-сэргэ эмиэ чугаһыыр, сомоҕолоһор.
Бу алтыһыы тыынынан, үтүө үгэһи үйэтитэн, күһүн аайы Александр Чиряев «физмат» кылааһын үөрэнээччилэрин уонна төрөппүттэрин айылҕалыын алтыһыннара, муҥхалата таһаарар. Быйыл 45 оҕо төрөппүттэрин кытта бу дьоһун дьарыкка кытынна. Айылҕаҕа сылдьарга үөрүйэхтэри тылынан эрэ буолбакка, бэйэ холобурунан көрдөрөн үөрэтии оҕолорго ордук дириҥник тиийэр, туһалаах буолар.
Сылыктаабыт сирдэригэр тиийэн, аал уоту алгыстаан, дьэ, үлэ үөһүгэр киирдилэр. Уолаттар аҕаларын батыһан, үөрэнэн истилэр. Сыралаах үлэ түмүгэ – дьиҥнээх көмүс бөллөх! Илии тутуурдаах дьиэлээтилэр.
Бу күн айылҕалыын алтыһан, сибиэһэй салгынынан тыынан, оонньоон-көрүлээн, бииргэ үлэлээн-хамнаһан, сэһэргэһэн, бары да астынан-дуоһуйан тарҕастылар. Айыы дьонун ситимэ өссө бөҕөргөйдө.
Диана КУЗЬМИНА, IX кылаас
«Кадр 12» медиа-киин, 12№ — дээх оскуола
Дьокуускай
keskil14.ru