От ыйын 8 күнүгэр Бэрдьигэстээххэ «Чыпчаал» стадиоҥҥа XXI-c «Манчаары оонньууларын» чэрчитинэн бастакы өрөспүүбүлүкэтээҕи «Кырсаада Куо-2021» күрэс ыытылынна. Бу киэһэ Саха сирин 11 саамай чаҕылхай, кэрэ, спорду өрө тутар кыргыттарыттан бастыҥнарын таллылар. Ол курдук, биэс түһүмэхтээх күрэһи ситиһиилээхтик ааһан Горнай кыыһа Милена Парфенова «Кырсаада Куо-2021» үрдүк аатын ылла.
1-вице «Кырсаада Куо» Аэлита Дмитриева (Бүлүү) ааттанна. 2-вице «Кырсаада Куо» Мэҥэ Хаҥалас кыыһа Дайаана Маркова буолла. Кыттыыны ылбыт кыргыттар бары анал ааттарынан бэлиэтэннилэр: Любовь Карадчина (Үөһээ Бүлүү) — «Кыыс Туйгун», «Ситим Куо», Дарина Анисимова (Өлүөхүмэ) — «Сэбэрэ Куо», Саина Степанова (Горнай) — «Айталы Куо», Лада Суздалова (Өлөөн) — «Чаҕыл Куо», Дария Горохова (Үөһээ Дьааҥы) — «Кэрэ Куо», Александрина Оконешникова (Орто Халыма) — «Кыыс Быһый», Полина Абрамова (Муома) — «Нарын Куо», Карина Постникова (Горнай) — «Туналы Куо».
«Кырсаада Куо-2021» Милена Парфенова туһунан кылгастык билиһиннэрэр эбит буоллахха, кини сааһа 20, ХИФУ устудьуона, талан ылбыт спордун көрүҥэ волейбол буолар, онно дьаныһан туран дьарыктанар.
Миленаны өссө төгүл эҕэрдэлиибит!
Анна СЛЕПЦОВА.