“Азия оҕолоро” норуоттар икки ардыларынааҕы VIII спортивный оонньуулар кыргыттар волейболларыгар бастыҥтан бастыҥ буолар иһин быһаарыылаах киирсиилэр саҕаланнылар.
“Чыпчаал” спортивнай комплекс от ыйын 3 күнүгэр хаһааҥҥытааҕар да күүстээх ыһыынан-хаһыынан туолла. Хас биирдии ыалдьааччы ох курдук оҥостон кэлбит.
Бэһис миэстэ иһин Саха өрөспүүблүкэтэ уонна Дальневосточнай Федеральнай уокурук (ДФО) хамаандалара оонньоотулар. 3:0 ахсаанынан ДФО бэһис миэстэни ылары ситистэ.
Казахстан уонна Кытай норуодунай өрөспүүбүлүкэлэрин икки ардыларыгар киирсиигэ 3:0 ахсаанынан Казахстан кыайда уонна сэттис миэстэни ылла.
«АЗИЯ ОҔОЛОРО» ЧАҔЫЛХАЙ КҮРЭХТЭҺИИ
Казахстан хамаандатын 3 №-дээх спортсмена Балайым Койлыбаева Казахстан Кызыл-Ата куоратыттан сылдьар. “Азия оҕолоругар” өр бэлэмнэммиттэр. Хас биирдии приемнарын, оонньуур техникаларын чочуйбуттар, уопсай физическэй дьарыгы ааспыттар.
– Биһиги хамаандабыт 12 киһиттэн турар. Араас куораттан сылдьабыт. Түргэнник билистибит, доҕордостубут. Тренердэрбит олус үчүгэйдэр. Хамаандабытыгар Арина Константиновна диэн медик баар. Дьокуускай куорат үчүгэй куорат. Тэрээһин барыта чуолкайдык толкуйдаммыт. Күрэхтэһэр сирбит үчүгэй. “Азия оҕолоро” чаҕылхай күрэхтэһии. Өйбөр-санаабар умнуллубат гына хаалла. Бу туһунан хаһан да умнуом суоҕа дии саныыбын, – диэн санаатын үллэһиннэ.
Аны полуфиналга киирэр иһин киирсиилэр саҕаланыахтара. Ханнык хамаандалар кыайыы биэтэгэр кэлиэхтэрэй? Күүтэбит!
Вадим КОЛЕСОВ, Х кылаас, Хайахсыт, Чурапчы
Видео, монтаж Света Заровняева, Вадим Колесов
“Азия оҕолоро” пресс-киин юнкордара