Садын сирин сүүнэ үөрүүтэ
Алмаастаах Мииринэй оройуонун биир кырдьаҕас үөрэҕин кыһата – Сүлдьүкээрдээҕи төрүт култуураны үөрэтэр 10 №-дээх уопсай орто үөрэх оскуолата — 90 сыллаах өрөгөйдөөх үбүлүөйүн бэлиэтээтэ. Биллэрин курдук, алмаас тааһынан аар-саарга аатырбыт Мииринэй араас омук иллээхтик-эйэлээхтик тоҕуоруспут дойдута буолар. Олор истэригэр, Бүлүү эбэ биэрэгэр, аҕыйах ахсааннаах эбэҥки омуга Сүлдьүкээр сиригэр тоҕуоруйан, түөлбэлээн олорор.
Бу үбүлүөйдээх сылы оскуола Любовь Алексеевна Николаева диэн эдэр, эрчимнээх дириэктэрдээх, 44 үөрэнээччилээх, 17 учууталлаах көрүстэ. Омос көрүүгэ, төһө да аҕыйах ахсааннаах буолларбыт, ситиһиибит элбэх.
Үбүлүөйдээх сылбыт өссө биир үтүө түгэни тосхойдо. Ол курдук, өр сыл кэтэспит кэтэһиибит, дьэ, туолан, оройуоммут салалтата сабыс-саҥа спортсааланы тутан, бэлэх уунна. Садын сирэ урут-уруккуттан күүстээхтэринэн, сымсаларынан биллэр. Өбүгэлэрин батан, уолаттарбыт эмиэ спордунан утумнаахтык дьарыктаналлар.
Кэнэҕэһин даҕаны биһиги ыччаппыт кыайыыга кынаттаныа диэн улаханнык эрэнэбит.
Наталия ЕВСЕЕВА, алын кылаас учуутала,
Наталия КИРИЛЛИНА, саха тылын учуутала.
Чөл олох төрдө
Быйыл күһүн биһиэхэ сабыс-саҥа, улахан да улахан спортсаала тутуллан, үлэҕэ киирдэ. Онон үөрүүбүт муҥура суох. Биһиги кылаас уолаттара үксүбүт дьарыкка сылдьабыт. Урут саалата суох буолан, сатаан дьарыктаммат этибит.
Билигин волейболлуубут, футболлуубут, баскетболлуубут. Саамай сөбүлээн тустууга уонна мас тардыһыытыгар сылдьабыт. Ол быыһыгар мэниктээн, сүүрэн-көтөн ылабыт.
Тренербит Валерий Валерьевич, кини олус үчүгэйдик дьарыктыыр. Мин доҕотторум Толик, Стасик, Владик, Петя, Коля уонна Максим буоламмыт бары бииргэ дьарыкка сылдьабыт. Улааттахпытына, араас күрэхтэһиигэ кыттар буолуохпут. Мин спорду наһаа сөбүлүүбүн, олоҕум ону кытта сибээстээх буолуон баҕарабын.
Савва САВВИНОВ, V кылаас.
“Дылачакаан”
Биһиги кылаас уолаттара маҥнайгы кылаастан ыллыыбыт. “Дылачакаан” ансаамбылга дьарыктанабыт, сороҕор үҥкүүлүүбүт.
Мин ыллыырбын ордоробун. Барыта уончабыт, саамай улахаттар биһиги, бэһистэр, буолабыт.
Салайааччыбыт – Иван Алексеевич Неустроев. Кини кулуупка үлэлиир. Биһигини сатаан тыынарга, куоласка арахсарга үөрэтэр.
Саамай сөбүлүүр ырыабыт “Доҕоттор”. Лэкиэс ырыата. Ити ырыа биһиги, доҕордуу уолаттар, туспутунан курдук.
Өссө “Оһуокай”, “Мин ийэм”, “Саҥа дьыл”, “Оҕо саас” диэн ырыалары ыллааччыбыт. Саха сирин гимнин эмиэ билэбит.
Арыый улааттахпытына салайааччыбыт араас күрэхтэргэ илдьэ барыах буолар. Билигин оскуолабыт үбүлүөйүгэр анаан, эбэҥкилии саҥа ырыаны үөрэтэ сылдьабыт.
Владик ЕГОРОВ, V кылаас.
Элбэхпит
Оскуолабытыгар биһиги саамай элбэх оҕолоох кылааспыт. Барыта аҕыспыт: икки кыыс уонна алта уол. Алын кылааска Зинаида Шмидтовна үөрэтэр этэ, биһиги кинини суохтаан ылабыт. Билиҥҥи салайааччыбыт – Тамара Васильевна.
Кыргыттарбыт Карина уонна Нарыйа үөрэнэллэрин сөбүлүүллэр. Саввабыт спорстмен бэрдэ.
Оттон Петя олус үчүгэйдик уруһуйдуур. Саамай сүүрүкпүт Коля, кини оонньуурун сөбүлүүр. Владик тиэхиньикэни интэриэһиргиир, кини олус сүрэхтээх, үлэһит уол.
Быйыл биһиэхэ саҥа үөрэнээччи Слава кэллэ, көмпүүтэргэ үчүгэй. Оттон мин эмиэ көмпүүтэрдиирбин, оонньуурбун уонна ас астыырбын сөбүлүүбүн. Сороҕор биһиги мэниктээн ылабыт, ол эрээри учууталлары истэбит.
Максим МЕРКУРЬЕВ, V кылаас.
Киэн туттабын
Оскуолабыт кыра, аҕыйахпыт. Хас биирдиибитигэр иккис дьиэбит кэриэтэ. Манна күндү учууталбыт Елена Олеговна Николаева күүтэр. Биһигини ааҕарга, суруйарга, эйэлээх, чиэһинэй, доҕордуу буоларга мэлдьи үөрэтэр.
Оскуолабытыгар араас элбэх тэрээһин ыытыллар. Мин маннык кырдьаҕас, бэйэтэ историялаах, үгэстэрдээх оскуолаҕа үөрэнэрбинэн киэн туттабын.
Эвелина ДАНИЛОВА, IV кылаас.
Сүлдьүкээр, Мииринэй.