Ыам ыйын 19 күнүгэр Пионерия күнүн бэлиэтээтибит. Пионер хаалтыһын маанан, пилоткатын кэтэн 92 саастаах кырдьаҕас бэтэрээн учууталга Прокопий Филипповичка кылааспыт аатыттан ыалдьыттаатыбыт.
Кини 1950 сылтан пионердары салайар баһаатай буола сылдьыбытын, бэйэтэ пионер буола сылдьыбыт кэмнэрин, сэрии саҕанааҕы пионердары кэпсээбитин сэргээн иһиттибит.
Кини наһаа үөрэн биһиэхэ пионерскай хамаандалары биэрбитэ, пионерскай барабааны тыаһаппыта. Учууталбытынаан Ирина Михайловналыын сэмэй бэлэхпитин биэрбиппит, Прокопий Филиппович наhaa үөрбүтэ.
Биһиги кылааспыт кини үрдүк аатын сүгэр. Кырдьаҕас учуутал туһунан кэпсиир стендэ баар. Прокопий Филиппович Александров учууталлар Учууталлара, Сунтаар улууһун үөрэҕириитин бэтэрээнэ, үөрэппит оҕолоро үөрэхтэригэр, үлэлэригэр ситиһиилээх буолалларын туһугар ис сүрэҕиттэн долгуйар.
П.Ф. Александров оҕону үөрэххэ көҕүлүүр сыалтан 4 кылааһы бүтэрэр туйгун үөрэнээччигэ стипендия олохтообута. Кини дуобаттыыр, саахыматтыыр.
Көрсүһүү түмүгэр биһиги бары хаартыскаҕа түспүппүт. Бүтэһигэр биһиэхэ үөрэхпитигэр кыһалларбытыгар, пионер курдук үлэһит, чиэһинэй буолуҥ диэн алгыс тылын эппитэ.
Маннык күн буолбута наhaa үчүгэй!
Саян ПЕТРОВ, 4 кылаас үөрэнээччитэ,
Күүкэй, Сунтаар.