Маар орто оскуолатын «Юла» медиакиин эдкора, оскуолабыт бэрэсидьиэнэ Авдей Неустроев Бэйэни салайыныы күнүгэр Ньурба улууһун Түмүк нэһилиэгин баһылыга Дмитрий Николаевич Егоровы кытта көрсөн кэпсэттэ. Көрсүһүү хайдах ааспытын сиһилии интервьюга билсиҥ.
— Үтүө күнүнэн Дмитрий Николаевич, хас биирдии ыал бүддьүөттээх, үптээх-харчылаах, нэһилиэкпит эмиэ. Биһиги нэһилиэкпит бүддьүөтэ туохтан турарый?
— Кыратык билиһиннэрдэхпинэ, Түмүк нэһилиэгин уопсай бүддьүөт доходнай уонна расходнай чаастаах буолар. Уопсай дохуодунан бастакынан нолуок буолар, боростуойдук этэххэ, НДФЛ. Үлэһит дьон хамнастарыттан 10% уонна неналоговай дохуоттан турар. Нэһилиэкпит дотационнай буоларын быһыытынан биһиэхэ өрөспүүбүлүкэттэн дотация кэлэр. Маны кытары араас боломуочунайга үбүлээһин көрүллэр. Уопсай бүддьүөт өттө маннык. Расходтарбытын көрүллэр ыстатыйаларынан тыыран бараммыт, депутаттар ырытаннар кэлэр сыллааҕы бюджеты ылыналлар. Расходтары депутаттар быһаараллар.
— Нолуок нэһилиэк бүддьүөтүн кытта туох сибээстээҕий?
— Сир нолуога, имущество нолуога, подоходнай нолуок нэһилиэк бүддьүөтүгэр киирэр.
— Быйыл Кыайыы 80 сылын бэлиэтиибит. Нэһилиэкпитигэр Кыайыыга аналлаах паамытынньык аан бастаан хас сыллаахха баар буолбутай уонна ону көрүүгэ-истиигэ туох ирдэбиллэр баалларый?
— Нэһилиэкпитигэр Улуу Кыайыыга аналлаах обелиск «Никто не забыт, ничто не забыто (1941-1945 сс.)» 2020 сыллаахха Маар орто оскуолатын 2008 сыллаах выпускниктарын көмөтүнэн реконструкция ыытыллыбыта.
— Биһиги нэһилиэккэ хас тыыл бэтэрээнэ, сэрии огдообото, сэрии оҕото олороруй?
— Биһиги нэһилиэкпитигэр бүгүнҥү күнҥэ икки тыыл бэтэрээнэ, уон сэрии сылларын оҕолоро олороллор.
— Кинилэргэ Кыайыы 80 сылынан туох көмө оҥоһулларый?
— Үбүлүөйдээх сылга эрэ буолбакка, сылын аайы сыл устата араас волонтерскай көмө оҥоһуллар: муус ылыыта, мас хайытыыта, хаар таһыыта уо. д.а. Улуу Кыайыы күнүгэр бородууктанан бэлэх, араас таһымнаах эҕэрдэ суруктар, бэлэхтэр туттарыллаллар.
— Нэһилиэкпит Кыайыы 80 сылын көрсөргө туох үлэни ыытарый?
— «Мантан сэриигэ барбыттара» сквергэ уот ситимиттэн сырдатыы тардыллыахтаах, Кыайыы обелискатын саҥардыы, сэрии кыттыылаахтарын, тыыл бэтэрээннэрин үйэтитии үлэлэрэ уонна, биллэн турар, Кыайыы күнүн дьоһуннук бэлиэтииргэ култуурунай бырагыраама бэлэмнэнэ сылдьар.
— Дмитрий Николаевич, кэпсэтиигит иһин махтал, көрсүөххэ диэри!
Биһиги нэһилиэк Улуу Кыайыы 80 сылын көрсөргө бэлэм. Кыралыын-улаханныын бэлэмнэнии үгэнигэр сылдьабыт, харах уулаах Улуу Кыайыы күнүн дьоһуннук көрсөргө бэлэммит. Барыта Кыайыы туһугар, эйэлээх олох туһугар!
Авдей НЕУСТРОЕВ, Маар орто оскуолатын 9 кылааһын үөрэнээччитэ, «Юла» медиакиин эдкора, Ньурба.
keskil14.ru