«Маленькая мисс Россия» күрэххэ Сахабыт сирин аатыттан алта саастаах Эбээн-Бытантай улууһун кыысчаана Кристина Черемкина кыттыыны ылар.
Билиҥҥитэ кини Сочи куоракка күрэхтэһэ тиийэ сылдьар. Күрэхтэһии үөрүүлээх арыллыыта саҕаланара баара-суоҕа 4 эрэ чаас хаалла.
Онтон сарсын маҥнайгы түһүмэх национальнай таҥастаах тахсан «Бэйэни билиһиннэрии» ыытыллар.
«Мин куоратым» диэн ааттаах түһүмэххэ кыргыттар бэйэлэрин төрөөбүт куораттарын туһунан көстүүм нөҥүө билиһиннэриэхтэрэ. Кристина бу түһүмэххэ сахалар тымныыбытын, ып-ыраас муус маҥан хаарбытын, силлиэлээх кыһыммытын ойуулуур көстүүмү кэтэн хааман көрдөрүө. Көстүүм ааптара модельер Петр Винокуров буолар.
Маны тэҥэ «Көрөөччү биһирэбилэ» анал аат иһин куоластааһын саҕаланна.
Сахабыт сирин аатын көмүскүүр кырачаан куоҕа Кристина Черемкинаҕа куоласкытын 5577 нүөмэргэ ТНФ 16 (пробеллаах) диэн суруйан СМС ыытаҕыт. СМС төлөбүрдээх — 20 солк.
Кырачаан куону бары бииргэ өйүөххэйиҥ!