Сылтан сыл аайы оҕо сахалыы саҥарбата улахан кыһалҕа буолан иһэр. Ол эрээри оҕолоро сахалыы эйгэҕэ улааталларыгар ис сүрэхтэриттэн баҕаран туран кыһаллар, туруулаһар төрөппүттэр баар буолан, судаарыстыбаннай уорганнарга дьайар кыах баар буолла. СӨ үөрэҕин миниистирэ Михаил Сивцев көҕүлээһининэн уопсастыбаннас кыттыылаах хамыыһыйа тэрилиннэ. Бу туһунан бэйэтин Инстаграмыгар эдэр ийэ Вилюяна Никитина («Ийэ тыл кэскилэ» түмсүү) суруйар.
Быйыл Өрөспүүбүлүкэ тылларын сайдыытын бырагыраамата үбүлэнэн, уопсастыбаннас үөрэбит. Үбүлэммэтэҕэ хас эмэ сыл буолла. Бу үбүлээһин хайысхаларын барылын оҥорорго СӨ Үөрэҕин миниистирин Михаил Сивцев көҕүлээһининэн уопсастыбаннас кыттыылаах хамыыһыйа тэрилиннэ.
Ол хамыыһыйаҕа СӨ тылларын сайдыытын салалтатын салайааччыта Р.Р. Жиркова, Үөрэх миниистирэ бэйэтэ, Ил Түмэн дьокутааттара Ф.В.Габышева, П.В.Ксенофонтов, Үөрэх, култуура министиэристибэлэрин, «Кэскил» оҕо бэчээтин кыһатын, «Саха сирэ» хаһыат, Олоҥхо тыйаатырын, «Айар» кинигэ кыһатын, Сахафильм үлэһиттэрэ, саха тылын учууталлара, төрөппүттэр киирдибит.
Кулун тутар 1 күнүгэр диэри хайысхалар, суумалар, индикатордар, о.э.ол туох көдьүүстээҕин көрдөрөр сыыппаралар хайыы үйэ быһаарыллан, докумуон Ил Дархаҥҥа илии баттаныахтаах. Бэҕэһээ, олунньу 8 күнүгэр, хамыыһыйа бастакы көрсүһүүтэ буолла. Эрдэттэн этиилэри хомуйбуттар, олус элбэх киирбит.
Бу мунньахха эмиэ элбэх санаа этилиннэ. Кыра оҕолор сахалыы саҥарбат буолбуттарын бэлиэтээн, уһуйааннарга, ойуулук (мультик) оҥоруутугар, бастатан туран, тылбааһыгар болҕомтону ууруохха диэн элбэх киһи эттэ. Саха тылын учуобунньугун төрөппүттэр, учууталлар сөбүлээбэттэрин биллэрдилэр. Ол эрээри учуобунньук оҥоһулларыгар 46 млн солк. наада эбит буоллаҕына, быйылгы сылга бу бырагыраама үбүлэнэригэр 56 млн солк анаммыт.
Онон барытын учуобунньукка ыыттахха, атыммыт хаалар. Ол иһин барытын бу бырагыраамаҕа сөҥнөөбөккө, атын бырагыраамаларга төһөнү, тугу киллэрэр кыаҕы быһааран, бүтүннүү киэҥник көрүөххэ диэн этии оруннаах буолла.