Виталий Васильев ыстаҥаҕа, куобахха өрөспүүбүлүкэ хас да төгүллээх абсолютнай чөмпүйүөнэ, Манчаары оонньууларын рекордсмена. Кини саха атлеттарыттан дьиҥнээх легенда. Виталий Васильевка Бэрдьигэстээххэ ыытыллыбыт «Манчаары оонньуулара» Спартакиада спортивнай карьератыгар алтыс буолбута. Манна кини ветераннар ортолоругар тахсан ыстаҥаҕа тэҥнээҕин булбатаҕа – төрдүс кыһыл көмүс мэтээлинэн наҕараадаланан баай коллекциятын толорбута.
Билигин Васильев рекорднай элбэх мэтээллээх – 19, олортон 12 кыһыл көмүс уонна 7 үрүҥ көмүс – 1999, 2005, 2009, 2013, 2017 уонна 2021 сылларга ылбыта.
Виталий Васильев 1983 сыллаахха Ньурбаҕа төрөөбүтэ. Ньурбаҕа спорт араас көрүҥнэригэр уһуйуллан, онтон 9-10 кылаастартан ыстаныынан дьарыктанан оскуоланы түмүктээбитэ. Салгыы СГУ (билиҥҥитэ ХИФУ) физкультурнай салаатын үөрэнэн бүтэрбитэ. Кыахтаах уол бу курдук оҕо, эдэр сааһыттан олоҕун спорду кытта ситимнээбитэ. Төрөөбүт Ньурбатын аатын элбэхтэ ааттаппыта.
Биһиги, «Муус устар» ыччат бэстибээлин «Расскажи о главном» медиа хайысхатын кыттааччылара, «Манчаары оонньууларын» туһунан проекпытыгар ааттаах-суоллаах спортсмен Виталий Васильев туһунан суруйуохпутун баҕарбыппыт. Ол туһуттан киниттэн интервью ылбыппыт уонна онтон сиэттэрэн тэттик ролик оҥорбуппут.
Виталий спортка олус дьоҕурдаах эбит. Оскуола сылларыгар волейбол, баскетбол, мас тардыһыы, хапсаҕай, сүүрүү да курдук көрүҥнэргэ физкультура учуутала Петр Петрович Кузьмин уһуйбут эбит. Онтон маҥнайгы тренера Чумпуров Григорий Дмитриевич атах оонньууларынан күүскэ дьарыктаан саҕалаабыт. Ити курдук Виталий Васильев «Манчаары оонньууларыгар» аан бастаан 1999 сыллаахха оҕолорго кыттан, буурга иккис, куобахха үһүс миэстэлэри ылары ситиспит. Уопсайа «Манчаары оонньууларыгар» 6-та кыттыбыт. 2012 сыллаахха Дьокуускайга бастакы рекордун олохтообута. Үс рекордааҕыттан биирэ билигин даҕаны куоһарылла илик, турар. Үс ыстаныы көрүҥүн уопсай сууммата — 135 м 15 см!
Виталий Васильев «Манчаары оонньууларын Олимпийскай оонньууларга холуур. Сахаларга сүрүн, кэтэһиилээх, үөрүүлээх күрэхтэһиибит диир. Виталий Васильев МЧС-ка баһаарынайынан үлэлиир уонна билигин даҕаны спордунан дьарыктанар. Быйыл Тааттаҕа буолар Спартакиадаҕа сыал-сорук туруорунан бэлэмнэнэ сылдьар. Номнуо сэттис «Манчаары оонньууларыгар»!
«Чемпион характера хайдах буолуохтааҕый?» диэн ыйытыыбар кини: «Хас биирдии киһи характердаах, ону сайынныарыахха, дисциплинаны тутуһуохха наада» диэн хоруйдаата. «Куһаҕан дьарыгынан үлүһүйүмэҥ, сыстымаҥ» диир.
«Манчаары оонньуулара» тус бэйэбэр спортсмен буолан үүнэн тахсарбар кынат биэрбитэ. Спорт эмиэ олоххо курдук түһүүлээх-тахсыылаах. Барыта биир тэҥ буолбат. Бу барыта күүстээх үлэттэн уонна сыраттан тахсар», — диэн кини этэр.
Кынаттаах кылыыһыт, легенда буолбут Виталий Васильев биһиги ыйытыыларбытыгар хоруйдаабытыгар олус үөрэн туран махтанабыт. Кэлэр «Манчаары ооньууларыгар» Тааттаҕа киниэхэ үрдүк ситиһиилэри баҕарабыт!
Эвелина Жданова, «Ыллык» эдкорпост, 1-Хаҥалас орто оскуолата, Ньурба.
keskil14.ru