Биһиги хос эһэбит Семенов Василий Семенович — Аҕа дойду Улуу сэриитин кыттыылааҕа. Кини 1920 сыл ахсынньытыгар Ньурба оройуонун Хорула сэлиэнньэтигэр төрөөбүтэ. Дьиэ кэргэнэ сүөһү иитэн, бултаан олорбут ыал эбит. Василий Даккы оскуолатыгар 2 сыл үөрэнэн баран салгыы үөрэммэтэх. “Октябрь төлөнө” холкуоһугар сааскы ыһыыга оҕус сиэтиититтэн саҕалаан от охсооччу буолуор диэри хара илиитинэн үлэлээбитэ. Салгыы 1939 сыл диэки Ньурбаҕа аһыллыбыт суоччуттар куурустарыгар үөрэнэ барар.
Онтон 1941 сыллаахха фашистскай Германияны утары Аҕа дойдуну көмүскүүр Улуу сэрии саҕаланар. Арыый аҕа саастаах убайдара бары фроҥҥа бараллар. Сэрии уһаан 1943 сыллаахха от ыйын 19 күнүгэр сэрии уоттаах толоонугар барар. Василий Семенов Илиҥҥи фроҥҥа империалистическай Японияны утары сэриигэ кыттыбыта. Сыалы үчүгэйдик табарын иһин Забайкальскай фронт 892-с стрелковай дивизиятыгар стрелогунан ананар. Сэрии ыар кэмнэрин дьонугар-сэргэтигэр кэпсээбэт үһү, ол кэмнэри ахтарын сөбүлээбэт эбит.
Сэрии бүппүтүн да кэннэ урусхалламмыт куораттары тутарга көмөлөһөн, салгыы сулууспалаан 1950 сыллаахха эрэ, балаҕан ыйыгар, дойдутугар эргиллэн кэлбитэ. Төрөөбүт дойдутугар тута биригэдьииринэн колхуоска үлэлиир.
Үлэлээбитин тухары сатабыллаах салайааччы, производствоны тэрийээччи быһыытынан үрдүкү салайар органнарга даҕаны, салайан үлэлээбит дьонугар-сэргэтигэр сыаналанара, улахан убаастабылынан туһанара. 1970 с., В.И.Ленин төрөөбүтүн 100 сылыгар, юбилейнай мэдээлинэн наҕараадаланар. 1967 с. алтынньы 30 күнүгэр Оройуон бочуотун Дуоскатыгар киирэр.
Төһө да кыра үөрэхтээҕин иһин Баһылай Сэмиэнэбис учуоту-отчуоту оҥороро аккуратнайын, төһө сүөһү кимиэхэ турарын, бородууксуйатын, хайа ыалга төһө от-мас тиэллиэхтээҕин төбөтүгэр илдьэ сылдьара.
1957 сыллаахха алтынньы ыйыгар “Знак Почета” орденынан оройуоҥҥа маҥнайгынан наҕараадаламмыта. Таһаарыылаах үлэтин иһин Москваҕа Норуот хаһаайыстыбатын Бүтүн Союзтааҕы быыстапкатыгар кыттар чиэстэммитэ.
Быйыл Улуу Кыайыы 80 сылын бэлиэтиибит. Биһиги хос эһэбит, Аҕа дойду Улуу сэриитин кыттыылааҕа, тутуу бэтэрээнэ, биригэдьиир Семенов Василий Семенович төрөөбүтэ быйыл 105 сааһа.
Кыайыыны уһансыбыт ытык дьоммутун биһиги, аныгы ыччат, умнубаппыт. Албан ааттарын сүрэхпитигэр илдьэ сылдьабыт!
Ньургун уонна Тимур Даниловтар,
Муома орто оскуолатын 5, 6 кылааһын үөрэнээччилэрэ