Балаҕан ыйын 26-27 күннэригэр Дьокуускай куоракка ыытыллыбыт «Боотурдар оонньуулара” өрөспүүбүлүкэтээҕи турнирга нэһилиэкпититтэн биэс тустуук кыттыыны ыллыбыт. Тренербит Аркадий Николаевич Тастыгин илдьэ сырытта.
Мин 30 киилэҕэ тустуохтаах этим да, ыйааһыммын хонтуруолламмакка, 30 кг 900 гр. буолан хааламмын 32 киилэҕэ туста киирбитим. Ыйааһыммар араас улуустартан 58 оҕо баара. Үс эргииргэ тиийэн баран, Чурапчы уолугар хотторбутум. Кини финалга тахсан, мин «утешительнайга» өссө иккитэ тустан кыайталаан баран, үһүс миэстэ иһин киирсиигэ Уус Алдан уолуттан кыһыылаахтык хотторон 5-с миэстэ буоллум.
Биһигиттэн Костя Платонов 26 киилэҕэ тустан, иккис миэстэ буолары ситистэ. Бииргэ эрчиллэр доҕорбутун бу улахан ситиһиитинэн эҕэрдэлиибин!
«Боотурдар оонньуулара” өрөспүүбүлүкэтээҕи турнирга 1400-тэн тахса оҕо кытта кэлбит. Бары бэлэмнээхтэрэ көстөр. Элбэхтэ күрэхтэһэр буоламмыт, элбэх оҕону кытта билсэбит, күрэхтэргэ наар көрсөбүт. Бу да сырыыга билэр оҕолорбун көрүстүм. Кинилэр төһө сайдыбыттарын, төһө бэлэмнээхтэрин кэтээн көрдүм. «Боотурдар оонньуулара» хас да көбүөрүнэн буолбута үчүгэй.
Бу турнир Илларион Федосеев сырдык кэриэһигэр ыытылынна. Кини Аан дойдуга сахалартан бастакы чемпион, көҥүл тустууга ССРС спордун маастара. «Боотурдар оонньууларыгар» кыттаммын Илларион Федосеев диэн Саха сирин улахан тустууга баарын биллим.
Инникитин да элбэх күрэхтэргэ кыттыам, элбэхтэ дьарыктаныам, кыайыылар кэлэллэрин хайаан да ситиһиэм!
Алик НОГОВИЦЫН, V кылаас,
тустуу секциятын иитиллээччитэ, Эмис, Амма