Талыы-талба ытык Таатта сиригэр «Дьулуруйар Ньургун Боотур» стадион уораҕайыгар төрүт күрэс көрүҥнэригэр XXll «Манчаары оонньуулара» күүтүүлээх үөрүүлээх арыллыытыгар «Кыайыыга 11 хардыы» уус-уран дьүһүйүү дьон кутун-сүрүн тутта. Саха олоҕун муудараһын көрдөрөр уус-уран дьүһүйүү сүрүн режиссера ааттаах-суоллаах артыыс, Олоҥхо тыйаатырын сүрүн режиссера, Таатталар киэн туттар киһилэрэ, Чөркөөхтөн төрүттээх Роман Романович Дорофеев буолар.
Дьүһүйүү мээнэҕэ «Кыайыыга 11 хардыы» диэн ааттамматаҕын режиссер этэр. Дьүһүйүү сүрүн дьоруойа Уруйдаан эһэтин кытары кыайыыга кынаттыыр 11 тосхолу ааһар.
Эһээ оруолун П.А. Ойуунускай аатынан Саха академическай тыйаатырын артыыһа, Таатта Боробулуттан төрдүлээх Петр Николаевич Баснаев толордо. Дьүһүйүү саҕаланыытыгар Уруйдаан диэн уол оҕо «Манчаары оонньууларын» туһунан билэн баран, эһээтиттэн күрэс ханнык көрүҥэ табыгастааҕын ыйытар, онуоха уол оҕоҕо ордук сахалыы атах оонньуута барсыаҕа диэн ыстаҥа туһунан сиэнигэр сэһэргиир.
Тааттаҕа ыытыллар күрэс төрүт көрүҥнэригэр XXII «Манчаары оонньуулара» 11 көрүҥнээх, онтон дьылбыт 12 ый тула эргийэр, ол курдук ыстаҥа 12 туостаах уонна 11 кэтиттээх.
Күрэххэ кыайыыны күүс эрэ аҕалбат, өй-санаа күүһэ, өйдөбүл күрэҕэ диэн баар, ону эн олоҕун суолун курдук көрсөҕүн. Хас биирдии кэрчик ис хоһоонноох. Киһи быһыытынан кыайыы 11 кэрчиккэ 12 дулҕаҕа турар.
Таатта улууһа былыр-былыргыттан уутуйан үөскээбит улуу суруйааччылар А.Е. Кулаковскай-Өксөкүлээх Өлөксөй, Былатыан Ойуунускай, А.И. Софронов-Алампа айымньылара «Кыайыыга 11 хардыы» уус-уран дьүһүйүүгэ төрүөт буоллулар. Маны таһынан Ытык киһи Борис Федорович Неустроев-Мандар Уус ойуута-бичигэ, мындыра, олоҕу көрүүтэ дьүһүйүү туруоруутун сүрүннээтэ.
Дьүһүйүү оҕолору айылҕаны кытары алтыһыыга, дьиэ кэргэҥҥэ тапталы, истиҥ сыһыаны иҥэрэргэ, үлэни өрө тутууга, үөрэххэ-билиигэ тардыһыыга, төрөөбүт тылы билэргэ, харыстыырга, төрүт үгэһи ытыктыырга, кыайыыга дьулуурга үөрэтэр.
Киһи сиэрдээх-майгылаах буоллаҕына, ханнык баҕарар успуорт көрүҥэр ситиһиилээх буолуон сөбүн бу дьүһүүйүү өссө төгүл бигэргэттэ.
11 кэрчиктэн түмүк кэрчик иллээх-эйэлээх олох туоһута. Ол бэлиэтэ үрүҥ туллукчаан эйэлээх олоҕу түстүүр.
«Кыайыыга 11 хардыы» уус-уран дьүһүйүү режиссерын кытары кэпсэтиибитин видеоҕа көрүҥ:
Яна ГУЗАИРОВА.
Кэрэспэдьиэн Стас ПОПОВ.
Оператор Туйаара МАМОНТОВА, «Кэскил» оҕо пресс-киинин эдкордара.
keskil14.ru