Өрөгөйдөөх Улуу Кыайыы үбүлүөйдээх 80 сылын көрсө «Кыайыы Знамята» өрөспүүбүлүкэтээҕи эстафетата тохсунньу 9 күнүттэн Мэҥэ Хаҥалас улууһуттан саҕалаан Амма, Уус Маайа, Алдан, Нерюнгри улуустарынан кэрийэн, тохсунньу 20 күнүгэр биһиги улууспутугар кэлбитэ.
Онтон бүгүн түөрт Геройдаах Байаҕантай нэһилиэгин олохтоохторо үөрүүлээх быһыыга-майгыга Кыайыы Знамятын көрүстүбүт.
Знамяны күөрэччи көтөҕөн анал байыаннай дьайыылар байыастара – «Бахмут куораты ылыы иһин» мэтээллээх, Эр санаа уордьан кавалера Станислав Александрович Кириллин, старшай сержант, «Хорсунун иһин» мэтээллээх Роман Николаевич Ноговицын, кылгас болдьоххо уоппускаҕа кэлэ сылдьар биир дойдулаахпыт Руслан Иванович Находкин – Россия Үлэ Геройа М.Н. Готовцев аатынан Танда орто оскуолатын ситиһиилээх үөрэнээччилэригэр чиэстээхтик туттардылар.
Байаҕантай нэһилиэгин баһылыга С.И. Егоров э5эрдэ тылыгар: «Биһиги нэһилиэкпитигэр бүгүн ураты күн. Аҕа дойду сэриитигэр биһиги нэһилиэкпититтэн уопсайа 139 киһи ыҥырыллан барбыта. Хомойуох иһин, 82 киһи төннүбэтэҕэ, 57 киһи Кыайыы көтөллөнөн эргиллэн кэлбиттэрэ. Күн бүгүн биһиги уолаттарбыт анал байыаннай дьайыыга эйэлээх халлаан туһугар кыттыыны ыла сылдьаллар. Ол курдук биир дойдулаахпыт Алексей Неустроев хорсун быһыыны оҥорон Россия Героя буолан кэлбитэ. Кыайыы Знамята биһиги нэһилиэкпитигэр кэлбитигэр махтанабыт. Улуу Кыайыы Байаҕантай нэһилиэгэр, биһиэхэ барыбытыгар олус улахан суолталаах. Эйэлээх халлаан баар буоллун!” – диэн эттэ.
«Кыайыы Знамята» өрөспүүбүлүкэтээҕи эстафета Уус Алданнааҕы делегациятын салайааччыта И.И. Аммосов: “Улуу Кыайыы тыына өлбөккө-сүппэккэ күн бүгүнүгэр диэри тиийэн кэлэн, үүнэр көлүөнэ ыччакка тиэрдии, сырдык өйдөбүл биһиги ытык иэспит буолар диэн бэлиэтиибит. Күн бүгүн биһиги улууспутугар 131 сэрии бэтэрээнин огдообото олорор, 230-тан тахса сэрии кэмин оҕолоро бааллар. Биһиги дойдубутугар сэрии ыар тыына эргиллибэтигэр баҕарабыт. Эдэр көлүөнэ ыччат эһиги үчүгэй үөрэххитинэн, билиигэ-көрүүгэ тардыһыыгытынан уонна үөрэхтээх дьон буолаҥҥыт дойду сайдыытыгар бэйэҕит кылааккытын киллэрсэн, эйэллээх халлаан анныгар олороргутугар баҕарабыт. Кыайыы Знамята Байаҕантай нэһилиэгэр олус улахан суолталаах. Владимир Дионисьевич Лонгинов Аҕа Дойду улуу сэриитигэр хорсун быһыыны көрдөрөн, 1943 сыллаахха Сэбиэскэй Сойуус Геройун аатын сүкпүтэ. Анал байыаннай дьайыылар байыаһа, биир дойдулаахпыт Алексей Михайлович Неустроев хорсун быһыыны көрдөрөн Россия Геройун үрдүк аатын ылбыта. Онон Байаҕантай нэһилиэгин ыччата дьоҥҥут-сэргэҕит, төрүттэргит үтүө үгэстэрин тутуһан, умнубакка, инникитин сирдьит оҥостон үрдүктэн үрдүк ситиһиилэргэ дабайа туруҥ”, – диэн эттэ.
Ону таһынан эҕэрдэ тылы Байаҕантай нэһилиэгин ветераннарын ааттарыттан И.И. Колодезников, анал байыаннай дьайыы кыттыылааҕа, биир дойдулаахпыт Р.И. Находкин, оскуолабыт лидерэ Кристина Бурнашева эттилэр.
Ити курдук бүгүн нэһилиэкпитигэр ураты күн буолан ааста. Үгүс сыранан, хаан тохтуутунан кэлбит Улуу Кыайыы тугунан да толуллубат ыар сүтүгүн, ааҥнаабыт алдьархайын үйэттэн үйэҕэ умнубакка өйдүү-саныы, сүгүрүйэ, киэн тутта сылдьар – биһиги ытык иэспит. История хаһан да сүппэт кэрэһитэ буолан өйбүтүгэр-санаабытыгар үйэлэргэ хаалыаҕа.
Валерия ГОТОВЦЕВА, Х кылаас, «Байаҕантай кэскиллэрэ» юнкорпост,
М.Н. Готовцев аатынан Танда орто оскуолата, Уус Алдан
Туйаара Мамонтова хаартыскалара, IX кылаас