Тохсунньу 23 күнүгэр А.И. Федотов аатынан спортивнай комплекска «Кыайыы Знамята» өрөспүүбүбүкэтээҕи эстафетаны көрсүү үөрүүлээх түгэнэ буолан ааста. Чурапчы нэһилиэгин дьоно-сэргэтэ Улуу Кыайыы бэлиэтин – Кыайыы Знамятын ытыктаан, сүгүрүйэн сүһүөхпүтүгэр туран көрүстүбүт.
https://vk.com/clip-199463452_456242678?c=1
Улууспут баһылыга Степан Анатольевич Саргыдаев, тыа сирин түөлбэтин баһылыгын бастакы солбуйааччыта Уйгулаан Ильич Туласынов, Аҕа дойду Улуу сэриитин бэтэрээнин оҕото, үлэ бэтэрээнэ Марфа Ефремовна Попова-Миронова, И.М. Павлов аатынан Чурапчы орто оскуолатын үөрэнээччитэ Владислав Красильников эҕэрдэ тылларын эттилэр.
Дьоһуннаах тэрээһиҥҥэ С.А. Новгородов аатынан Чурапчы орто оскуолатын үөрэнээччилэрэ уонна учууталлара «Кыайыы күнэ» ырыаны өрө көтөҕүллүүлээхтик толордулар. Дмитрий Петрович Соловьев салайааччылаах «Беркут» байыаннай-патриотическай кулууп иитиллээччилэрэ сатабылларын көрдөрдүлэр, дьон-сэргэ сэҥээриитин ыллылар.

Бүгүҥҥү суолталаах күн туһунан дьон санаатын ыйыталастым.
Сергей Сергеевич Абрамов, Чурапчы гимназиятын география уонна ОБЗР учуутала, «Мохсоҕол» байыаннай-патриотическай кулууп салайааччыта:
– Быйыл Улуу Кыайыы 80 сылын бэлиэтиибит. Кыайыы Знамятын көрсүү хас бирдии оҕону патриотическай иитиигэ улахан суолталаах дьаһал буолар. Бастатан туран, биһиги дьоруой хос эһэлэрбитин, эбэлэрбитин өйдүү-саныы, ытыктыы сылдьыахтаахпыт. Кинилэр олохторун толук ууран туран Улуу Кыайыыны уһансыбыттарыгар махтаныах тустаахпыт.

Дьулуур Попов, И.М. Павлов аатынан Чурапчы орто оскуолатын Х кылааһын үөрэнээччитэ, «Память» байыаннай-патроиотическай кулууп иитиллээччитэ:
– Кыайыы Знамята Аҕа дойду туһугар сэриилэспит хорсун буойуттарбытын санатар аналлаах. Биһиги, оҕолор, патриот быһыытынан төрөөбүт дойдубутун таптыахтаахпыт. Бэйэҕит тус санааҕытын мунньаҥҥыт дойдугут туһугар үлэлии-хамсыы сылдьыҥ, үүнэ-сайда туруҥ диэн баҕа санаабын тиэрдэбин.

Мин «Беркут» кулууп показательнай выступлениетын олус сэҥээрдим. Дьулуур эппит тылыгар сөбүлэһэбин. Дьоммут-сэргэбит эйэлээх олох туһугар охсуспут хорсун быһыыларын хаһан даҕаны умнумуохха. Эйэлээх олох туһугар сайда туруохха, үчүгэйгэ эрэлбитин сүтэримиэххэ!
София ГОГОЛЕВА, VIII кылаас, «Тумус кыһа» пресс-киин,
С.К. Макаров аатынан Чурапчы гимназията
Видео, хаартыска ааптара Валерия Степанова, VIII кылаас