Кулун тутар 28-30 күннэригэр Чурапчы улууһун «Спортивные Якутяне» үөрэнээччилэр спартакиадаларыгар 14-15 саастаах оҕолорго волейбол өрөспүүбүлүкэтээҕи сүүмэрдиир күрэх буолла. Бүгүн кулун тутар 30 күнүгэр бүтэһик быһаарыылаах күн тосхойдо.
Өрөспүүбүлүкэбит 18 улууһуттан, куораттартан барыта 34 хамаанда кэлэн күрэхтэстэ.
Финальнай киирсиилэр түмүктэринэн волейбол бастыҥнарынан кимнээх ааттаннылар?
Уолаттарга 1 миэстэ – Нам улууһа; 2 миэстэ – Таатта улууһа; 3 миэстэ – Мииринэй куорат. “Бастыҥ көмүскээччи” – Алтан Афанасьев (Нам), “Бастыҥ связующай” – Николай Никонов (Таатта); “Бастыҥ нападающай” – Будимир Мыреев (Нам); “Бастыҥ оонньооччу” – Вадим Бальнаев (Мииринэй)
Кыргыттарга 1 миэстэ – Чурапчы улууһа; 2 миэстэ – Дьокуускай куорат; 3 миэстэ – Мииринэй куорат. “Бастыҥ көмүскээччи” – Виолетта Акимова (Сунтаар); “Бастыҥ связующай” – София Пестерева (Дьокуускай); “Бастыҥ нападающай” – Карина Хилиуллина (Мииринэй);“Бастыҥ оонньооччу” – Соня Соловьева (Чурапчы)
Үс күннээх волейбол түмүгүнэн бастыҥнар истэригэр киирбит 8 оҕо эмиэ “Спортивные Якутяне” үөрэнээччилэр сайыҥҥы спартакиадаларыгар кыттар чиэскэ тигистилэр.
Волейбол элбэх күүһү-уоҕу, тулууру эрэйэр спорт көрүҥэ буоларын илэ харахпытынан көрөн итэҕэйдибит. Көрөргө сүрдээх интэриэһинэй.
Финальнай киирсиилэри манна көрүҥ https://t.me/keskil_media2020
Кыттааччылар этэллэринэн, волейболу үчүгэйдик оонньуурга уһуннук үөрэниэххэ наада. Оҕолор бары үчүгэй баҕайытык оонньоотулар. Хамаанда тренерэ уонна чилиэннэрэ биир киһи курдук кыайыы иһин күүскэ кииристилэр, олус түмсүүлээхтэр. Хас биирдии хамаанда күүстээх бэлэмнээҕэ, волейболга дьоҕурдааҕа көһүннэ.
Күрэхтэһии бары кыттааччыларын чэгиэн-чэбдик доруобуйаны, мэлдьи ситиһии эрэ сиэттистин. Эһигини кытта спорт арахсыспат аргыс буолуохтун диэн баҕа санаабытын этиэхпитин баҕарабыт!
Спорт бүгүннү олох көрдөбүлэ. Спорт доруобай, чөл эт-хаан, өй-санаа, сиэр-майгы мэктиэтэ!
Арина СОТНИКОВА, X кылаас, Валерия СТЕПАНОВА, VII кылаас,
“Тумус кыһа” пресс-киин, С.К. Макаров аатынан Чурапчы гимназията
Арина Сотникова хаартыскалара