«Поем двором» Бүтүн Арассыыйатааҕы акция чэрчитинэн бүгүн, ыам ыйын 5 күнүгэр, Дьокуускай куорат олохтооҕор, Аҕа дойду Улуу сэриитин бэтэрээнэ Кирилл Егорович Павлов олорор дьиэтин олбуоругар эҕэрдэ кэнсиэр туруорулунна. Кыайыы күнүгэр аналлаах эҕэрдэ кэнсиэр Дьокуускай куоракка олорор алта сэрии бэтэрээнин дьиэлэрин олбуордарыгар бүгүн-сарсын ыытыллар.
Дьокуускай куорат 10 №-дээх «Туллукчаан» оҕо уһуйаанын иитиллээччилэрэ, 1 №-дээх Оҕо ускуустубатын дьиэтин хоровой отделениетын үөрэнээччилэрэ, Саха Өрөспүүбүлүкэтин филармониятын солистара Алексей Солдатов, Леонид Анциферов, Дьокуускай куорат Норуот айымньытын киинин ансаамбыла кыттыыны ылан, Кыайыы көтөллөөх ырыалары бэтэрээҥҥэ бэлэх ууннулар. Дьокуускайдааҕы кадетскай интэринээт-оскуола кадеттара Кыайыы маршынан бэтэрээни эҕэрдэлээтилэр.
99 хаарын санныгар түһэрбит Аҕа дойду сэриитин бэтэрээнэ Кирилл Егорович 1944 сыллаахха Илиҥҥи фроҥҥа сулууспалаабыта. Япония Квантун аармыйатын урусхаллааһыҥҥа уонна Монголияны босхолооһуҥҥа кыайыыны уһансыбыта.
Сэрии бэтэрээнигэр туһуламмыт Саха Өрөспүүбүлүкэтин Бырабыыталыстыбатын, Дьокуускай куорат дьаһалтатын, Ил Түмэн депутаттарын ааттарыттан эҕэрдэ тыллар этилиннилэр. СӨ Бырабыыталыстыбатын бэрэссэдээтэлин солбуйааччы Анатолий Семенов Кирилл Егорович олоххо көхтөөх позициялааҕынан бэлиэтээн эттэ. Маны таһынан Ил Дархан Айсен Николаев үбүлүөйдээх Кыайыы сылыгар анаммыт сэрии бэтэрээннэригэр төлөбүрүттэн Кирилл Егорович анал байыаннай дьайыы байыастарын өйөбүлүгэр ыыппытын киэн тутта, махтана иһитиннэрдэ.
Россия Геройа, «Патриот» ыччат киинин салайааччытын солбуйааччы Николай Евдокимов Арассыыйа Дьоруойдарын уонна бойобуой дьайыыга сылдьар байыастар ааттарыттан истиҥ эҕэрдэтин бэтэрээҥҥэ тиэртэ, «Кыайыы иннибитигэр, эһиги холобургут биһиэхэ Кыайыыны кынаттыыр», — диэн долгуйа эттэ.
Онтон Кирилл Егорович хос сиэнэ Дьокуускай куорат лиссиэйин 8 кылааһын үөрэнээччитэ Амалия Тимофеева хос эһээтин туһунан киэн тутта кэпсээтэ. Ол туһунан видеоҕа көрүҥ:
keskil14.ru