Звенит в ушах лихая музыка атаки,
Точней отдай на клюшку пас, сильней ударь,
И всё в порядке, если только на площадке
Великолепная пятерка и вратарь.
Суровый бой ведет ледовая дружина,
Мы верим мужеству отчаянных парней,
В хоккей играют настоящие мужчины,
Трус не играет в хоккей!
Трус не играет в хоккей!
Кырдьыга да, халтарыкаан хаҥкыга, килэрийэр мууска сүүрэ сылдьан оонньуурга модун санаалаах эрэ киһи сананар буолуохтаах.
«Азия оҕолоро» кыһыҥҥы оонньууларыгар Саха сирин хоккейга сүүмэрдэммит хамаандата 2 сыл утумнаахтык бэлэмнэннэ. Онон тренердэрэ Яков Владимирович Сандаков уолаттарыгар эрэнэрин биллэрэр.
Састаапка Дьокуускай, Нерюнгри оонньооччулара бааллар. Хапытаанынан саха уола Ярослав Егоров ананна. Кинини ыксаллаах түгэҥҥэ быһаарыныыны түргэнник ылынар, бэйэтигэр эрэллээх, барыларын кытта тапсар уонна күүстээх санаалаах диэн талбыттар. Оҕолор да кини буоларыгар баҕаларын эппиттэр.
Ярослав Егоров Дьокуускай 20-с №-дээх оскуолатыгар VII кылааска үөрэнэр. Хоккей секциятыгар 3 сааһыттан сылдьар. Онтон ыла уол, хал буолбакка, сүрэҕэлдьээбэккэ, атыҥҥа аралдьыйбакка, сыал-сорук оҥостон, дьаныардаахтык дьарыктанар. Россия таһымнаах күрэхтэһиилэргэ элбэхтэ кыттар. Кини НХЛ-га киирэр ыра санаалаах.
“Азия оҕолоро” оонньуулар аһыллыытыгар Ярослав Егоров Саха Өрөспүүбүлүкэтин былааҕын тутан киириэҕэ.
Хамаандаҕа Ярославтан кыра саастаах Максим Оборин баар. Кини VI кылаас үөрэнээччитэ. Эмиэ Ярослав курдук, дьыссаат саҕаттан хоккейга сылдьар.
Уолаттарбыт олунньу 11 күнүгэр бастакы оонньуулара буолар. Күннээх Туркменистан хамаандатын кытта киирсиэхтэрэ. Ол кэнниттэн В бөлөххө киирбит Урал уокуругун уонна Казахстаны кытта.
Манна даҕатан эттэххэ, тас дойдулартан казахтар саамай элбэх спортсменнаах кэлбиттэр – 73 кыттааччылаахтар. Оттон саамай аҕыйах ахсааннаах – Араб Холбоһуктаах Эмираттара. Сноубордка эрэ холонон көрүөхтэрэ.
Оонньуу барыта “Саха” НКИХ ханаалынан быһа көстүөҕэ. Онно анаан 100-чэкэ киһи (суруналыыстар, оператордар, техниктэр уо.д.а) үлэлии барбыттара.
Онон олунньу 9 күнүгэр күнүс 16.00 чаастан “Саха” НКИХ ханаалынан “Азия оҕолоро” кыһыҥҥы I оонньуулар аһыллыытын көрөөрүҥ. Сахалин олохтоохторо үс аҥаар тыһыынчаттан тахса билиэти барытын 1,5 чаас иһигэр ылан бүтэрбиттэрин туһунан кэпсииллэр. Музыкальнай-театрализованнай дьүһүйүүгэ 2000 киһи кыттыаҕа. Биһигиттэн эмиэ артыыс бөҕөтө барбыта. Онон уратыны, дьиктини көһүтэбит.