Кутана орто оскуолатыгар «Уол оҕо-норуот кэскилэ» бырайыагынан оскуола эр дьоно уонна уолаттар куйуурдаатылар. Итиэннэ араас сатабылга эстафетаҕа күрэхтэстилэр.
Кутана уолаттара куйуурдаатылар. Кыра уолаттар төрүт дьарыгы көрдүлэр-иһиттилэр, боруобалаатылар даҕаны. Улахан уолаттар ойбон алларыытыгар күрэхтэстилэр. Ол кэннэ сааны хомуйууга, сыал ытыыга, хайыһарга илин-кэлин түһүстүлэр.
Оскуола директора Владимир Николаевич Архипов — оскуола эр дьонун түмсүүтүн салайар. Кинилэр быйыл 6-11 кылаастар уолаттарыгар бу бырайыак чэрчитинэн үһүс тэрээһиннэрин ыыттылар. Күһүн сыал ытыытыгар, балыктыырга, собо ыраастыырга, күөс күөстүүргэ уо. д. а. сатабылларга үөрэммиттэрэ. Кэмпэндээйи уолаттарын ыҥыран муҥхалаабыттара. Инньэ гынан сатабыллара, үлэҕэ үөрүйэхтэрэ чиҥээтэ. Кутанаттан тэйиччи сыһыыларынан, күөллэринэн сылдьан, сири-дойдуну да көрдүлэр.
Кулууп дириэктэрэ Петр Петрович Потапов ойбон алларыыга маастар-кылаас көрдөрдө. Кини уопуттаах куйуурдьут, ойбон алларыыга улуус чөмпүйүөнэ, республикаҕа 4-с миэстэлээх. «Алгыс» культуура киинин аатыттан түөрт бириис туттарда.
Ааптар: Изабелла Третьякова, Сунтаар улууһун Кутана орто оскуолатын «Кутана кыымнара» юнкорпост салайааччыта