Үөскээбит сирэ – Испания
Куруолук үөскээбит сирэ Испания. Мантан Рим саллааттара кинини Италияҕа киллэрбиттэр. Онтон ыла аан дойду үрдүнэн тарҕанар. Билигин араас дойдуларга дьиэ кыыла гынан иитэллэр.
Куруолук уонна куобах уратыта
Ойуур куобаҕа уонна дьиэ куруолуга тас көрүҥнэрэ, аһыыр астара майгыннаһаллар. Кинилэр куобах бииһин ууһугар киирсэллэр, ол эрэн уратылара элбэх.
Куруолук
Атаҕа кылгас, этэ-сиинэ толору ньолбоҕор. Төрүөҕэ элбэх, сылы эргиччи ууһуур. Хараҕа сабыылаах, түүтэ суох оҕолору төрүүр. 15 сыл олоруон сөп. Дьиикэй айылҕаҕа тыыннаах хаалбат эбит. Киһитэ суох сатаммат. Бэлэм уйаҕа сылдьар. Бу кыыллар түүннэри-күнүстэри аһыыр кыахтаахтар. Ол эрэн бириэмэни тутуһан аһатарга түргэнник үөрэнэллэр. Онон, кыһын күҥҥэ үстэ аһыыллар. Куруолук ордук сытарын сөбүлүүр. Түүтэ кыһыннары-сайыннары биир өҥнөөх буолар.
Аһылыга
Ис уоргана кыһыҥҥы аска үөрэнэрин курдук, кинини эрдэттэн бэлэмнээһин барар. Сайын сибиэһэй күөх отунан-маһынан аһаталлар. Куруолук айылҕатынан оту-маһы кэрбиир идэлээх. Үчүгэйдик хаппыт оту ордук сиир, маннык от белога элбэх буолар. Оттон талах лабаатын кэрбээтэҕинэ тииһэ сытыыланар. Кыһынын уу оннугар хаары сиир. Бурдук (сэлиэһинэй, нэчимиэн, эбиэс) астаах. Оҕуруот аһын моркуобу, сүбүөкүлэни, оҕурсуну, тыкваны, кабачогу сөбүлүүр.
Уйата
Куруолук кырыыһалаах, үс эркинэ тимир сиэккэнэн эргитиллибит уйаҕа кыстыыр. Тыалтан, хаартан харыстаан бириһиэнинэн бүрүйэллэр. Буруустан оҥоһуллубут уопсай кыстыыр уйалаах буолар. Кыһын, таһырдьа сөпкө дьаһанан көрдөххө, этэҥҥэ кыстыыр. Кыһын тымныыга түүтэ ордук тупсар. Олус ыраас кыыл. Сымнаҕас майгылаах.
Куобах
Атаҕа уһун, этэ-сиинэ дьып-дьап, ньолоҕор сирэйдээх. Сылга биирдэ ууһуур, оҕолоро харахтарын көрбүтүнэн төрүүллэр. Саамай уһаабыта 2 сыл олорор. Уйатын сиргэ бэйэтэ оҥостор. Дьиикэй айылҕаҕа тыыннаах хаалар дьоҕурдаах. Түүн ордук аһыыр эбит. 1 чааска 70 км. сүүрүөн сөп. Түүтүн өҥө саас уонна кыһын уларыйар.
Ааптар Чэмэлиинэ Михайлова, Үөһээ Бүлүү.
Ити курдук, куруолук уонна куобах олус уратылар. Куобах киһиэхэ бэриммэт көҥүл кыыл, онтон куруолук дьиэ кыыла. Түргэнник ситэр, төрүөхтээх. Бу дьарык кыылга-сүөлгэ истиҥ сыһыаны, эппиэтинэстээх, кыһамньылаах буолууну уонна үлэҕэ үөрэтэр. Эһиги эмиэ куруолукта иитин, элбэтин. Оҕолорго сүрдээх үчүгэй дьарык. Үлэлииргэ, харыстыырга, таптыырга үөрэтэр.
Нюргуяна Захарова,
Худуоһунньук Анна Иванова.