Саха сирин дьахталларын, кэрэ аҥаардарын бу бэлиэ күнүнэн «Кэскил» оҕо бэчээтин кыһатын эдэр кэрэспэдьиэннэрэ, хоһуун уолаттара, эҕэрдэ тылларын аныыллар.
Күндү кыргыттар! Куруук күүстээх санаалаах, инникигэ эрэллээх, кэрэ уонна тапталлаах буолуҥ!
Күндү ийэлэрбит, эбэлэрбит, эдьиийдэрбит, учууталларбыт уонна бииргэ үөрэнэр кыргыттарбыт!
Барыгытын Аан дойду дьахталларын күнүнэн эҕэрдэлиибин! Этэллэр дии, кулун тутар 8 күнэ – сааскы бырааһынньык диэн, ол эрэн саас эһиги баар буолан кэлэр. Эһиги үөрдэххитинэ, оннооҕор былыттаах күн сандаарарга дылы, оттон эһиги аттыбытыгар баар буоллаххытына, ханнык баҕарар кыһалҕаны кыһарабыт.
Бу күн биһиги, уолаттар, бэлэх эрэ биэрэр күммүт буолбатах. Бу күн эһиэхэ сылаас уонна ис сүрэхтэн тахсар тыллары этэргэ үөрэнэбит. Биһиги эһиги сылаас сыһыаҥҥытын, көрө-харайа сылдьаргытын сыаналыыбыт. Эһиги кыһамньыгытын көрөн үөрэбит, эһигинэ суох олохпут суоҕун кэриэтэ.
Тулуургут, кэрэҕит уонна үчүгэй буоларга угуйаргытын иһин махтанабыт! Дьоллоох уонна тапталлаах буолуҥ.
Кирилл Волков, 11 кылаас, Мииринэй орто оскуолата
Биһиги күндүтүк саныыр кэрэ аҥаардарбытын кыргыттар күннэринэн Саха сирин уолаттарын ааттарыттан барыгытын эҕэрдэлиибит. Кэрэ аҥаардар баар буоланнар, дьиэбит сырдык, ыраас, күннэтэ биһигини минньигэс астаах көрсөллөр. Ол иһин бу сааскы күн ийэлэрбитигэр, эбэлэрбитигэр махтанар, кинилэри үөрдэр – биһиги ытык иэспит.
Саха кыргыттара бары күндүлэр, кыраһыабайдар, элбэх сатабыллардаахтар. Эһиэхэ үгүс кыайыыны, чэгиэн доруобайаны, үөрэххэ ситиһиини баҕарабын.
Богдан Слепцов, М.Е. Васильева аатынан 2 Малдьаҕар орто оскуолатын 8 кылааһын үөрэнээччитэ, Хаҥалас
Мин тапталлаах эбэм 1953 тохсунньу 25 күнүгэр Бүлүү улууһугар Күн сирин көрбүтэ.
Мин күндү эбэм Зоя Дмитриевна Кустуурга кийииттээн кэлбитэ уонна биэнсийэҕэ да тахсан баран, өр сылларга бэтэринээринэн үлэлээбитэ. Элбэх наҕараадалаах, улуус бочуоттаах олохтооҕо. Эбэбин, бары кыргыттары кэрэ аҥаардар күннэринэн эҕэрдэлиибин! Бу курдук олоххо эрэллээх, бэһиэлэй буоларгытын баҕарабын. Эбэм киһи быһыытынан үтүө санаалаах, дьоҥҥо куруук көмөлөһөр. Миигин арааһынай аһынан күндүлүүр, кэһиинэн маанылыыр. Кини мин иккис ийэм кэриэтэ буолар. Мин хомойдохпуна – кини хомойор. Мин үөрдэхпинэ – кини үөрэр. Кини миигин куруук өйүүр, оттон мин кинини эмиэ. Мин эбэбин наһаа таптыыбын уонна убаастыыбын.
Стас Попов, Кустуур орто оскуолатын 8 кылааһын үөрэнээччитэ, Эбээн Бытантай национальнай улууһа
Мин бэйэм Таатта улууһун Ытык Күөлүттэн үөрэнэ кэлбитим. Бу сандал саас маҥнайгы кэрэ бырааһынньыгынан Аан дойду дьахталларын күнүнэн Саха сирин ийэлэрин, эбэлэрин, эдьиийдэрин уонна балыстарын итиитик-истиҥник эҕэрдэлиибин. Түгэнинэн туһанан мин саамай чугас, тапталлаах ийэбин Юлия Алексеевна Матаннанованы эҕэрдэлиэм этэ. Күн курдук киһибэр махталбын уонна эҕэрдэбин аныыбын. Бу сааскы күн кэриэтэ мин ийэм мичээрэ сып-сырдык, сылааһынан илбийэр үтүө сыһыана миэхэ саамай күндү. Ол иһин баҕарыам этэ ийэбэр кытаанах доруобуйаны, куруук үөрэ-көтө сылдьарыгар уонна хаһан даҕаны кырдьыбакка өрүү биһиги аттыбытыгар баар буоларгар.
Ийэм сүрэҕэ дьолунан эрэ туоллун, биһиги өрүү күүс-көмө буолуохпут! Ийээ, мин эйигин күүскэ да күүскэ таптыыбын!
Арсений Никифоров, Ф. К. Попов аатынан Баатара орто оскуолатын кадетскай 6 кылааһын үөрэнээччитэ