Алын сүһүөх кылаас үөрэнээччилэрин сайыннарар Бүтүн Арассыыйатааҕы «Орлята России» федеральнай бырагыраама 2021-2022 үөрэх дьылыттан үлэлиир. Федеральнай бырагыраама ис тутулун, ис хоһоонун, туруорар ирдэбиллэрин уларыппакка туран, 2023-2024 үөрэх дьылыттан А.Г. уонна Н.К. Чирээйптэр ааттарынан Дьокуускай куорат национальнай гимназия алын кылааһын учууталларын кафедратын көҕүлээһининэн, Саха сиринээҕи «Өксөкү сиэннэрэ» бырагыраама, «ЭРКЭЭЙИ ЭРГИИРЭ» сүрүн туһаайыыларынан сирдэтэн оҥоһуллан, өрөспүүбүлүкэ үрдүнэн тэтимнээхтик үлэлии турар.
«Өксөкү сиэннэрэ» бырагыраама научнай сүбэһитэ – педагогика билимин хандьыдаата, этнопедагог, «Өксөкүлээх үөрэҕэ» бырайыак ааптара Екатерина Петровна Чехордуна. «Орлята России» Саха сиринээҕи «Өксөкү сиэннэрэ» бырагырааманы «Росдетцентр» федеральнай тэрилтэ «Оҕо саас сирдьиттэрэ» регионнааҕы тирэх киинэ, Н.Е. Мординов аатынан «Кэскил» оҕо бэчээтин кыһата, А.Г. уонна Н.К. Чирээйэптэр ааттарынан Дьокуускай куорат национальнай гимназията сүрүннүүр.
«Өксөкү сиэннэрэ» «Орлята России» федеральнай бырагыраама тирэх өйдөбүллэрин оҕо сахалыы толкуйунан, сахалыы тылынан ылынарыгар сөптөөхтүк аттарыллан, федеральнай ирдэбили тутуһан оҥоһуллар. Саха суруйааччыларын оҕолорго айымньылара, саха норуотун остуоруйалара, таабырыннара, өс хоһоонноро, сомоҕо домохторо, сахалыы ырыалар, хамсаныылаах оонньуулар, кумааҕыны кырыйан, кырааскалаан оҥорор сорудахтар – барыта «Орлята России» сэттэ хайысхатын (трек) ис хоһоонугар сөп түбэһэр гына наарданан, ыйыллан оҥоһуллаллар. Хас дьарык аайы оҕо тугу билбитин туһунан бэйэтигэр эргиллэн ис туругун иһиллэнэригэр, бэйэтин бэйэтэ сыаналанарыгар ыйан-кэрдэн биэрэр ыйытыылар, тургутуктар, тэттик кинигэлэр бааллар.
2024, 2025 сс. «Чуораанчык» сурунаалга бэчээттэммит «Орлята России» – «Өксөкү сиэннэрэ» дьарыкка туттуллар дидактическай матырыйааллар барыта түмүллэн, Саха Өрөспүүбүлүкэтин Национальнай бибилэтиэкэтин электроннай полкатыгар киирдилэр.
«Өксөкү сиэннэрэ: дьарыкка туттуллар матырыйааллар» диэн 210 страницалаах үөрэххэ аналлаах таһаарыыны «Орлята России» – «Өксөкү сиэннэрэ» бырагааманан үлэлиир алын кылаас учууталлара барытын бииргэ туттан олорон, толору туһанар кыахтанныгыт.
Бу сигэнэн киирэн көрүҥ, туһаныҥ https://nlrs.ru/open/151786
кэскил14.ру