Олунньу 13 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр ийэ тыл, сурук-бичик күнүгэр аналлаах дьоро тэрээһинэ ааста. «Мичээр» уһуйаан биир дьоһуннаах бырагырааманы бэлэмнээн көрдөрдө. Бу тэрээһиҥҥэ оҕолор, төрөппүттэр уонна иитээччилэр мустан, бииргэ түмсүүлээхтик кыттыстылар.
Кырачааннар бэйэлэрэ сахалыы национальнай таҥастарынан киэргэнэн, чабырҕах аахтылар, олоҥхолоон дорҕоонноттулар, уонна иитээччилэрин кытта үөрэ-көтө оһуохайдыы түстүлэр. Ону тэҥэ, оҕолор национальнай хамсаныылаах уонна да атын оонньуулары үөрэтэн көрдөрдүлэр, үөрэттилэр.
Юлия Иннокентьевна Трофимова, «Мичээр» уһуйаан сэбиэдиссэйэ бу кун туһунан маннык кэпсээтэ: «Биһиги, «Мичээр» уһуйаан, оҕолорбутун сахалыы көрө иитэбит. Ол иһин оҕолорун сахалыы улаатыннарыан баҕарбыт төрөппүттэргэ көмөлөһөбүт. Бүгүҥҥү тэрээһиҥҥэ хайдах төрөппүттэри кытта биһиги оҕолорбутун фольклорга, чабырҕахха, оһуохайга, олоҥхоҕо үөрэтэрбитин көрдөрдүбүт. Уопсайынан биһиги «Мичээр» уһуйаан төрөппүттэри кытта оннук иитэргэ-үөрэтэргэ үлэлэһэбит. Уонна баҕарыахпыт этэ бары саха дьоно төрөөбүт тылларын билэн, сахабыт диэн киэн тутта сылдьалларыгар.»
Маннык тэрээһиннэр уһуйаан оҕолорун төрөөбүт тылларыгар уонна култуураларыгар тапталы иҥэрэргэ туйгун холобур буолар.