Бүлүү улууһун Чинэкэ нэһилиэгин мусуойун үлэһитэ, Саха өрөспүүбүлүкэтин үөрэҕириитин туйгуна Светлана Демьяновна Яковлева комсомол күнүгэр аналлаах матырыйаалын эһиги болҕомтоҕутугар таһаарабыт.
Комсомол-ыччаты өрө күүрдэр сүдү күүс
Комсомолга улааппыт
Хорсун оҕо саастарбын,
Хоһоон-тойук ууһаппыт
Хонуктарбын-сахтарбын
Хаһан, тоҕо умнуомуй,
Хайдах туойбат буолуомуй!?
Үгүс элбэх дьон, ордук аҕа уонна орто саастаах көлүөнэ дьылҕата комсомолу кытта ыкса сибээстээх. Комсомолга киирэн ыччат дойду олоҕун бары эйгэтигэр актыыбынайдык кыттара уонна бэйэтин дьылҕатын, дойду, норуот бүттүүнүн дьылҕатын иһин эппиэтинэстээҕин билинэрэ. Комсомол ветераннара норуоту кытта бииргэ аан дойду бүтүннүүтэ билиммит улуу державаларын туппуттарынан киэн туттар бырааптаахтар.
Чинэкэ нэһилиэгэр аан маҥнайгы комсомольскай тэрилтэлэр “Дарда” уонна “Саҥа сайдыы” колхозтарга 1930 сыллаахха тэриллибиттэрэ. Саҥа былаас соруктарын олоххо киллэриигэ сүрүн күүһү, партия уҥа илиитигэр, комсомолга, сүктэриллибитэ. Бу кэмнэргэ үлэлээбит комсомол чилиэннэрэ элбэх өйдөтөр үлэни ыыталлара, бэйэлэрин үлэлэринэн холобур көрдөрөллөрө.
Сэрии уоттаах сылларыгар инники кирбиигэ комсомол сылдьара, бэйэтин таһаарыылаах үлэтинэн, дьону тылыгар киллэрэр дьоҕурунан, кыаммат дьоҥҥо көмөтүнэн, бэриллибит сорудаҕы кэмигэр толорорунан дьонтон биир тутум үрдүк сылдьара. Бу кэмнэргэ үлэлээбит комсомол секретардарыгар буолаллар торуой Чочуга Калинин аатынан колхозка, сэрии иннинэ Семенов Михаил Николаевич, сэрии сылларыгар Семенова Вера Сергеевна, Сымалыырга “Саҥа суол” колхозка Афанасьев Дарвидон Николаевич, Уоттуга “Сталин” аатынан колхозка Мякишева Александра Федотовна.
Сэрии кэнниттэн дойдуну чөлүгэр түһэрии, үлэ саҥа ньымаларын олоххо киллэрии, комсомол кэккэтин хаҥатыы курдук сүрүн үлэлэргэ комсомол инники күөҥҥэ сылдьара. Ол кэмнэргэ комсомол секретардарынан үлэлээбиттэрэ Корякин Иннокентий Ильич, Протопопова Александра Сергеевна, Веревкин Иван Прокопьевич, Дорофеева Матрена Никитична, Александрова Валентина Федоровна, Сортоева Раиса Павловна.
Колхоз бөдөҥсүйэн совхоз буолбута. Комсомол секретардарын үлэлэрэ өссө күүһүрбүтэ. Совхоз 4 отделениетын барытын хабан араас тэрээһиннэргэ, күрэхтэһиилэргэ кытыннарар, түмэ тардар соруктааҕа. Совхоз комсомольскай тэрилтэтин секрктардарынан үлэлээбиттэрэ – Веревкин Рудольф Иванович, Кузьмин Николай Алексеевич, Алексеев Трофим Кузьмич, Дмитриев Петр Васильевич, Калачикова Акулина Васильевна, Протопопов Сергей Викторович, Тонгоесова Любовь Прокопьевна, Николаев Прокопий Афанасьевич, Протопопов Владимир Прокопьевич, Гаврильева Анна Михайловна, Кириллина Татьяна Михайловна, Дьячковская Татьяна Павловна. Степан Аржаков аатынан совхоз ыччаттара үлэҕэ, үөрэххэ, ыччат хамсааһыннарыгар, уус-уран самодеятельноска республикаҕа, оройуоҥҥа өрүү инники кирбиигэ сылдьыбыттара.
1968 сыллаахха республикаҕа аатырбыт ыанньыксыт, Октябрьскай революция уонна Үлэ Кыһыл знамятын орденнарын кавалера Мария Никитична Иванова бастакы ыччат –комсомольскай звенотун тэрийбитэ. Бу звеноҕа 1981 сыллаахха кулун тутар ыйга Бүлүү комсомолун 60 сылын аатынан коллектив аата иҥэриллибитэ, комсорунан Ульяна Иванова үлэлээбитэ. 1984 сыллаахха Бүтүн Союзтааҕы социалистическай куоталаһыы кыайыылааҕынан буолбуттара, комсорг Вероника Бубякина этэ. Маны таһынан хас да ыччат – комсомольскай звенолара үлэлээбиттэрэ. Совхоз элбэх Правительственнай наҕараадалары ыларыгар сүҥкэн улахан кылааттарын киллэрбиттэрэ.
Совхозка Бүлүү куоратын выпускниктара комсомольскай путевканан үлэлии тахсаллара. Дьиҥнээх үлэ үөһүгэр буһан-хатан, доҕордуу күүһүн, үлэ үөрүүтүн эттэринэн-хааннарынан билэн дуогабардаах сыллара бүтэн сорохторо сөбүлүүр идэлэригэр үөрэххэ туттарса, сорохторо ыал буолан олохсуйан хаалтара.
Биһиги нэһилиэктэн комсомольскай путевканан ыччат комсомольскай тутууларыгар үлэлээбиттэрэ – Семенова Нина Гаврильевна. Кини Мирнэй куорат тутуутун бастакы комсомольскай этэрээтин чилиэнэ. Галямова Елизавета Коновна – БАМ тутуутугар газосварщигынан үлэлээбитэ. Егоров Яков Степанович, Егорова Александра Николаевна Аммаҕа Мээндиги кырыс сирин туһаҕа таһаарыыга бастакы комсомольскай этэрээккэ сылдьыбыттара.
Эдэр ыччат инники күөҥҥэ сылдьара, үлэҕэ, спортка көхтөөх буолара оскуола саҕаттан чочуллан, акылаатын ууруллан кэлэрэ. Оскуола комсомольскай тэрилтэтин сытыы-хотуу, художественнай самодеятельность көхтөөх кыттааччыта, үөрэҕэр бастыҥ, үөрэнээччилэр салайаллара. Кинилэр истэригэр бааллар – Иванова Элеонара, Федорова Оля, Николаева Люция, Иванов Альберт, Протопопов Артур, Протопопова Алена, Бубякина Паша, Иванова Долгуйаана.
Биһиги киэн тутта ааттыыбыт бастыҥ комсомолецтарбытын. Светлана Александровна Корякина- комсомол Бүтүн Союзтааҕы15-съеһин делегата. Араас кэмнэргэ Уобаластааҕы комсомольскай конференция делегаттара: Сортоева Раиса Павловна, Веревкин Иван Прокопьевич, Иванов Альберт Николаевич, Николаев Прокопий Афанасьевич. Иванов Алексей Иванович-үөрэх туйгуна Москваҕа комсомол Киин комитетын Кыһыл Знамятыгар хаартыскаҕа түһэр чиэскэ тиксибитэ.
Комсомол күүрээннээх үлэтиттэн тирэх ылбыт дьоммут билигин да эдэр дууһалаахтар, араас тэрээһиннэргэ көхтөөхтүк кытталлар.
Ытыктабыллаах комсомол ветераннара! Эһиги айымньылаах үлэҕэ күүскүтүн холбоотоххут, Сахаҕыт сирин сайдар суолугар кылааккытын киллэрдэххит. Ыарахантан чаҕыйбакка, үлэттэн куоппакка олох хардыытынан дойдугут сайдарыгар күүскүтүн уурбуккут, санааҕытын холбообуккут сыаналанан үлэһит үтүөлэрэ буолан дьон махталын ыллаххыт. Доруобай, дьоллоох буолуҥ эдэрдии эрчимнээх комсомол ветераннара.
Ыччаты кэскилгэ угуйар
Сулус этэ комсомол.
Эдэри үлэҕэ күүрдэр
Сыаллаах этэ комсомол.
Эҕэрдэ эһиэхэ эдэр сааһым
Эрэллээх аргыстарым!
Улуу Ленин комсомолун
Уруйдаах улуу күнүнэн!