Алтынньы 26 күнүгэр Комсомол күнүн көрсө, Пионерия 100 сылынан октябренок, пионер уонна комсомол буола сылдьыбыт аҕа саастаах дьоммут кэлэн ыалдьыттаабыттара. Кинилэр бу күн туохха аналлааҕын кэлэн кэпсээбиттэрэ. Билиэттэрин, значоктарын, хаартыскаларын аҕалан көрдөрбүттэрэ. Пионердар тустарынан ырыа ыллаабыппыт.
Бу тэрээһини мин хаартыскаҕа түһэрэ сылдьан эмиэ ылласпытым уонна урукку комсомоллар кэпсээннэрин интэриэһиргии истибитим. Онтон пионердарга ыалдьыттарбыт опрос оҥорбуттара. Бу күн Зинаида Семеновна Иванова санаатын маннык үллэстибитэ:
— Алтынньы 29 күнэ – Комсомол күнэ. Ол күҥҥэ биһиги тэрээһиммит ананна. Мин оскуолаҕа 1967 с. киирбитим, кылааспытыгар 34 этибит. Үчүгэйдик үөрэнэр оҕолору октябренокка ылар этилэр, октябренок атыттарга холобур буолар: үөрэҕинэн, бэрээдэгинэн, тутта-хапта сылдьарынан, таҥаһынан-сабынан. Улахан кылаас оҕолоро баһаатай буолаллара. Араас күрэхтэри ыытар этилэр, ыллаталлар-үҥкүүлэтэллэр, оонньотоллор, биһиги кылаас 5 баһаатайдаах этибит. Онтон 9 сааспытыгар бэйэбит пионерга киирдибит. Манна эмиэ үөрэхтэригэр үчүгэй, көхтөөх оҕолору ылаллара. Учууталбыт Валентина Николаевна Тимофеева оҕолору наһаа үчүгэйдик тэҥник тутар этэ, сэрии ветераннарыгар мастарын хайытан-сааһылаан, хаардарын күрдьэн, тэлгэһэлэрин ыраастаан, Кыайыы күнүгэр дьиэлэригэр тиийэн ыллыыр оҕолор ырыа бэлэхтиир этилэр. Нэһилиэк дьонугар көмөлөһөргө оскуолаттан үөрэппиттэрэ. Улахан кылаастарга комсомолга киирбиппит. Ити Булгунньахтаах оскуолатыгар этэ. Онно Булгунньахтаах сопхуоһугар күүс-көмө буоларбыт. Ыанньыксыттыыр этибит, хотоммуммут күһүн сыбыыбыт, 25-тии ынахтаахпыт, үстэ ыыбыт. Оттуурга көмөлөһөрбүт, закваска оҥорорбут, күөлтэн уу таһарбыт. Дэриэбинэҕэ кулууптан арахпат этибит. Комсомоллор кулууп дьиэтин тупсарарга, киэргэтэргэ көмөлөһөрбүт, кэнсиэр тэрээһинигэр кыттарбыт. Күнүһүн хотон, киэһэ өттүгэр кулууп дьиэтэ.
2008 с. мин коммунистар кэккэлэригэр киирбитим. Араас хамсааһыннарга кыттар буолбутум. Сэкирэтээринэн талыллан үлэлии сылдьабын. Билигин 8-пыт. Оскуола оҕолорун кытта ыкса үлэлэһэр соруктаахпыт. Оскуола учуутала Марина Николаевна Васильева биһиэхэ өйөбүл буолар.
Аман ЕРЕМЕЕВ,
М.Е. Васильева аатынан 2-с Малдьаҕар орто оскуолатын 7 кылааһын үөрэнээччитэ.