Оскуола саамай көхтөөх, инники күөҥҥэ сылдьар үөрэнээччилэрэ оҕо общественнай тэрилтэтигэр түмсэллэр. В. П. Ларионов аатынан Майа орто оскуолатын «Клуб Ларионовцы» оҕо тэрилтэтэ үгүс көлүөнэни ситимнээбит, ситиһиигэ кынаттаабыт дьоллоох оҕо саас уйата буолар. Педагог тэрийээччилэр — Людмила Иванова, Евдокия Прохорова уонна Мирослава Горохова.
«Клуб Ларионовцы» лиидэрдэрин саамай күүтүүлээх үгэс быһыытынан ыытыллар тэрээһиннэрэ «Коммунарскай сбор» быйыл муус устар 23 күнүгэр ыытылынна. Бэлиэ тэрээһин Пионерия, Саха АССР төрүттэммиттэрэ 100 сылларыгар ананна.
Бу күн оскуолабытыгар С. А. Новгородов аатынан Чурапчы, Ф. Г. Охлопков аатынан Майа, С. З. Борисов аатынан Тыыллыма орто оскуолаларын, И. Г. Тимофеев аатынан Майатааҕы лицей тумус туттар лиидэрдэрэ ыалдьыттаатылар. Үөрэнээччилэр этэрээттэринэн арахсан доҕордоһуу түһүлгэтин көҕүлүттэн туттулар.Ырыалаах-үҥкүүлээх бэйэни билиһиннэрии, мааршынан хаамыы, хаһыат оҥоруу, Пионерия кэмин сырдатар станцияларынан онньуулар тэтимнээхтик ыытылыннылар.
Бу күн ыҥырыылаах ыалдьыттарынан cаха эстрадатын сулустара Гоша Васильев-Джида, Иннокентий Лебедев — Амикан, блогер Алеся Сосина буоллулар. Эдэр ыччат бүттүүн сөбүлээн истэр ырыаһыттара үөрэнээччилэргэ айымньылаах үлэлэрин туһунан сырдаттылар, аныгы тэтимнээх эҕэрдэлэрин бэлэх ууннулар. Бу күн «Клуб Ларионовцы» оҕо тэрилтэтин выпускниктара Наташа Егорова, Айна Забровская ыалдьыттаатылар. Кинилэр оҕолорго устудьуон олоҕун умнуллубат сылларын туһунан сырдаттылар, хамаанданы түмүүгэ аналлаах оонньуулары ыыттылар.
Бу курдук, үгэс быһыытынан ыытыллар «Коммунарскай сбор» үгүс ыччаты доҕордоһуу түһүлгэтигэр түмэр, саҥаттан саҥа сулустары чаҕылыҥната таһаарар.
«Мэҥэбил» пресс-киин.