Семен Андреевич Новгородов аатынан Чурапчы орто оскуолатын VIII “Б” кылааһын үөрэнээччилэрэ Эрчим Поисеев, Арчын Поисеев төрүччүлэрин умсугуйан туран үөрэтэллэр. Чурапчыга ыытыллыбыт Оҕо аймах уйгулаах ыһыаҕар “Мин эһэм, эбэм – Улуу Кыайыыны уһансыбыттара” диэн түһүлгэҕэ хос эһэлэрин, хос эбэлэрин туһунан билиһиннэрдилэр.
– Хос эбэбит Захарова-Пермякова Мария Семеновна тыыл, үлэ бэтэрээнэ. 1911 сыллаахха Боотурускай улууска Мугудайга төрөөбүтэ. 1942 сыллаахха балтын Маайаны кытта “Комбайн” холкуоһу кытта көһөрүллэн Кэбээйи оройуонугар фроҥҥа балыктыы барбыта. Хос эбэбит Кыайыыга киллэрбит кылаатын иһин “1941-1945 сс. Аҕа дойду Улуу сэриитин кэмигэр килбиэннээх үлэтин иһин” мэтээлинэн бэлиэтэммит. Онтон хос эһэбит Захаров Прокопий Васильевич эмиэ тыыл, үлэ бэтэрээнэ. 1898 сыллаахха Боотурускай улуус 1 Хатылы (Кытаанах) нэһилиэгэр төрөөбүт. Аҕа дойду Улуу сэриитин кэмигэр 1941-1942 сс. Ааллаах Үүҥҥэ таһаҕас таһыытыгар сылдьыбыт. 1943 сыллаахха “Ярославскай” холкуоһу кытта хоту Булун оройуонугар көһөрүллүбүт. “1941-1945 сс. Аҕа дойдй Улуу сэриитин кэмигэр килбиэннээх үлэтин иһин” мэтээллээх, – диэн Эрчим Поисеев, Арчын Поисеев төрүт өбүгэлэрин туһунан киэн тутта кэпсииллэр.
Буолан ааспыт быыстапка түһүлгэтэ аҥардас экспонаттар эрэ буолбатахтар. Бу быыстапка Ийэ дойдубутугар уустук кэмҥэ норуот олоҕо туруктаах буоларын туһугар сыраласпыт дьоммут хорсун быһыыларын туһунан кэпсиир дириҥ ис хоһоонноох диэн көрдүм. Сэрии кэмигэр түбэспит көлүөнэ трагическай дьылҕалара история тыыннаах туоһулара буолаллар.
Карина СИВЦЕВА, VIII «А» кылаас,
Ф.Г. Охлопков аатынан Майа орто оскуолата, Мэҥэ Хаҥалас