Дьокуускай куоракка «Лена» киинэ тыйаатырыгар Индия киинэтин фестивалын чэрчитинэн «RRR: “Рядом ревет революция» диэн режиссер С. Раджамаули уһулуччу сюжетынан аан дойду билиниитин ылбыт киинэтин көрдөрдүлэр.
Артыыстар умсугутуулаахтык оонньууллара — киинэ ситиһиитигэр биир сүрүн бэлиэ буолара саарбаҕа суох. Киинэҕэ иһиллэр «Naatu Naatu» ырыа аан бастаан Индия киинэлэритттэн 2023 с. 95-с төгүлүн ыытыллыбыт «Оскар» бириэмийэтин туттарыы сиэригэр үрдүк ситиһиилэнэн, статуэтканан бэлиэтэммитэ!
Киинэ — араас омук дьонун түмэр, чугаһатар искусство ураты көрүҥэ буоларын маннык фестиваллар кэрэһилииллэр. СӨ тас сибээскэ уонна норуоттар дьыалаларыгар миниистирэ Гаврил Кириллин бэлиэтээн этэринэн, билигин Индия уонна Саха сирин ыккардыгар култуура, киинэ хайысхатыгар бииргэ үлэлээһин торума бигэргэнэн, саҥа саҕахтар арыллан иһэллэр. Ол курдук, “Создано на Дальнем Востоке” форум түмүгүнэн, Саха сиирттэн “Экстра Синема” уонна Индияттан «Janta Cinema» хампаанньалар Индияҕа киинэ саалаларын арыйаллара былааннанар. Ыам ыйыгар Саха сирин делегацията Индияҕа киинэ фестивалыгар кыттан кэлбитэ эмиэ бииргэ үлэлээһин олуга ууруллубутун бэлиэтиир.
Индия өрөспүүбүлүкэтин Россияҕа посолун солбуйааччыта Никхилеш Гири креативнай индустрияны сайыннарыыга Саха сирэ табыгастааҕын, тоҕоостооҕун, алтынньыга Индия режиссердара, актердара кэлиэхтэрин иһитиннэрдэ.
— Россия уонна Индия уруккуттан хардары үтүө сыһыаннаахтар. Саха сирэ—олус кэрэ сир. Саха сирин олохтоохторо Индия туһунан билэллэр, сүрдээх истиҥник сыһыаннаһаллар. Туймаада Ыһыаҕар сырыттахпытына, биһиэхэ миэчээрдэбитинэн кэлэн, эҕэрдэлииллэрэ үтүө өйдөбүлү хаалларда. Уонна бүгүн биһиги киинэбитин көрөөрү үгүс киһи тоҕуоруспута эмиэ олус үчүгэй. Саха сирин “Экстра Синема” хампаанньата киинэ саалаларын арыйара былааннанар. Олус улахан нэһилиэнньэлээх Индияҕа киинэ сүрүннээн тэлэбиидэнньэ, Интернет-стриминг нөҥүө тарҕанар. Оттон кыаммат араҥаҕа аналлаах, удамыр сыаналаах киинэ көрдөрөр сирдэр тиийбэттэр. Онон сахалыы технология көмөтүнэн, дьоммутун-сэргэбитин кинематографка чугаһатыахпытын баҕарабыт, — диэтэ Никхилеш Гири.
Индия өрөспүүбүлүкэтин Владивосток куоракка Генеральнай консула Гаурав Сиддартх: “Саха норуота биһиги дойдубутугар улахан интэриэстээҕэ үөрдэр. Индия уонна Саха өрөспүүбүлүкэтэ култуураҕа эрэ буолбакка, экономика өттүгэр эмиэ хардары бииргэ үлэлииллэрэ күүтүллэр. “RRR: “Рядом ревет революция” киинэни дойдубут Премьер-миниистирэ Шри Нарендре Моди кэрэхсии, астына көрбүтэ, эһиги эмиэ сөбүлүөххүт диэн эрэнэбин”, — диэтэ. Гаурав Сиддартх оҕо сылдьан комикстары, тэттик кэпсээннэри сөбүлээн аахпытын, итиэннэ “Алдан”, “Кыталыктаах кырдалым” сахалыы киинэлэри кэрэхсии көрбүтүн аҕынна.
Фестиваль Саха өрөспүүбүлүкэтин Бырабыыталыстыбатын өйөбүлүнэн, Индия Владивостоктааҕы Генеральнай консульствотын уонна “Лена” киинэ тыйаатырын тэрийиилэринэн ситиһиилээхтик ыытылынна.
Жанна Леонтьева.
Ааптар түһэриилэрэ.
keskil14.ru