Киһи биирдэ бэриллэр олоҕор талан ылбыт таптыыр идэтэ үйэтин тухары сырдыкка сирдиир, тыын угар, олоҕун уһатар үрдүк анала буолар. Учуутал — үйэлэр тухары Аан дойду үтүмэн үгүс норуоттарыгар өрө тутар, этэргэ дылы, норуокка бастакы киһи быһыытынан сыаналанар идэ.
Онон учуутал, мин санаабар, олох тутаах киһитэ. «Ыччаты иитэр уонна үөрэтэр үлэҕэ учуутал тутаах күүһүнэн буолар. Бастатан туран, кини бэлэмиттэн, уопутуттан, төһө идэтин баһылаабытыттан, биһиги ыччаппыт кэлэр кэскилэ быһаччы тутулуктах. Онон учуутал күүһэ кини билиитигэр буолар…», — диэн этэн турар СССР норуодунай учуутала Михаил Андреевич Алексеев.
Дьылҕа хаан ыйааҕынан буолуо, мин эбээм Клавдия Прокопьевна Иванова нуучча тылын уонна литэрэтиирэтин учууталын идэтин талан, Ньурба оройуонун Хаҥалас орто оскуолатыгар 37 сыл үөрэх эйгэтигэр үлэлээн-хамсаан кэлбитэ. Бэйэтин идэтигэр олус бэриниилээхтик, ис дууһатыттан кыһаллан туран, үгүс сыратын, күүһүн-күдэҕин оҕолорго анаабыта. Нуучча тылын уонна литературатын уруоктарыгар таба суруйарга, саҥарарга, улуу нуучча суруйааччыларын айымньыларын дириҥэтэн ырытан ааҕыыны, өйгө үөрэтиини күүскэ ирдээн туран үөрэппитэ.
Бу ый 15 күнүгэр Ил Түмэн дьокутаата Григорьева Антонина Афанасьевнаттан убаастабыллаах ветеран учууталларбыт: эбээм Клавдия Прокопьевна, математика учуутала Виктория Ивановна Иванова, начаалынай кылаас учуутала Марфа Степановна Васильева, детсад уһуйааччылара Елизавета Петровна Антонова, Люция Васильевна Кутанова Махтал сурук тутан үөрүүлэрэ үксээтэ.
Күндү ветеран учууталларбытын Педагог уонна уһуйааччы сылынан эҕэрдэлиибин, баҕарабын үтүө доруобуйаны, дьолу, саргыны!
Олеся Петрова, 11 кылаас, «Ыллык» эдкорпост, Хаҥалас, Ньурба.