Муус устар 13 күнүгэр оскуолабытыгар улуустааҕы научнай-практическай кэнпириэнсийэ буолан ааста. Бу тэрээһин Николай Романович Константинов 75 сыллаах үбүлүөйүгэр ананан ыытылынна.
Н.Р. Константинов муус устар 22 күнүгэр 1947 с. Бөкчөнөө нэһилиэгэр колхуостаах дьиэ кэргэнигэр төрөөбүтэ. Оскуолаҕа 1954 с. киирбит. Маҥнайгы учууталын Розалия Терентьевнаны ийэтин тэҥэ истиҥник ахтар. Аҕата Роман Петрович оскуолаҕа анаан дьиэтин биэрбитин олохтоохтор махтана саныыллар. Николай Романович баҕа санаатын толорон авиаинструктор, архивист курдук сэдэх идэлэри баһылаан Эдьигээн улууһун баһылыгынан, национальнай архив дириэктэринэн үлэлээбит. Үгүс элбэх доҕоттордоох, үлэлээбит сирдэригэр кинини куруук истиҥник саныыллар. Хас биирдии үлэһиккэ болҕомтолоох сыһыанын, үлэлиир миэстэлэрин тэрийиигэ болҕомтотун уурарын ахтыыларыгар бэлиэтииллэр. Николай Романович айылҕаҕа сылдьарын сөбүлүүр, бултуур, балыктыыр. Спордунан ситиһиилээхтик дьарыктаммыт. Ригаҕа үөрэнэр сылларыгар гиирэ анньыытыгар чемпион буолбут, боксаҕа Латвия сборнайыгар киирбит. Туйгун үлэтин иһин элбэх наҕараадалардаах.
Улахан кыыһа Саргы – финансист. Дьокуускайга соцстрах үлэһитэ, кэргэннээх, 3 оҕолоох. Улахан уол Айсиэн Московскай архитектурнай институт академиятын (МАРХИ) бүтэрэн Москваҕа олорор, үлэлиир. Оҕолоро оскуола, детсад саастаахтар. Кыра кыыс Туйаара Санкт-Петербурга култуура институтун бүтэрбит, министиэристибэ тутаах специалиһа. Икки кыыстаах, кэргэннээх.
Николай Романович оҕо иитиитигэр кыһамньытын, дойдутугар бэриниилээҕин биир чахчытынан биһиги оскуолабыт попечителэ буолан оскуолаҕа, оҕолорго оҥорор өҥөтө элбэх. Ол курдук биир бэйэтэ оскуола библиотекатыгар 100-тэн тахса кинигэни бэлэхтээбитэ. Оскуолабыт таһыгар кылааһынан үүннэрбит мастара үтүө өйдөбүл буолан силигилээн үүнэн тураллар.
Бу кэнпириэнсийэҕэ биһиги кылааспытыттан Диана Балданова, Айылҕан Иванов уонна мин буолан ситиһиилээхтик кытынныбыт. Мин кыттыбыт секциябар 5 кылаас үөрэнээччитэ Марсель Петров 1 миэстэ ылла.
Николай Романовичка кытаанах доруобуйаны, дьиэ кэргэнигэр байылыат олоҕу баҕарабыт!
Галя ЕВСЕЕВА, Өкүндү оскуолатын 6 кылааһын үөрэнээччитэ.