Тохсунньу 24 күнүгэр Г.И. Чиряев аатынан Бүлүүтээҕи бастакы нүөмэрдээх оскуолаҕа, Бүлүү улууһун үөрэнээччилэригэр иккис сылын ыытыллар баскетбол күрэҕэ буолла. Бу күрэх оскуолабыт 2021 сыл выпускнигар, анал байыаннай дьайыы кыттыылааҕар Дмитрий Винокуров сырдык кэриэһигэр ананар.
Дмитрий оскуолаҕа үөрэнэ сылдьан баскетболга утумнаахтык дьарыктанар буолан оскуолабыт, улууспут чиэһин өрөспүүбүлүкэҕэ элбэхтик көмүскээбитэ. Кини «Бастыҥ оонньооччу» уонна «Бастыҥ кимээччи» диэн анал ааттар кыайыылааҕа этэ. Кини 2023 сыл бэс ыйын 4 күнүгэр анал байыаннай дьайыыга кытта сылдьан тэҥэ суох киирсиигэ Запорожскай уобаласка сырдык тыына быстыбыта. Россия Президениттэн «Эр санаа иһин» уордьанынан наҕараадаламмыта.
Диманы чиэстээн тэриллибит баскетбол күрэҕэр 7 оскуола хамаандалара тэринэн кэлэн күөн көрүстүлэр. Ол курдук Кыргыдай, Дьөккөн, Бороҕон, Бүлүүтээҕи гимназия, I, II, III нүөмэрдээх орто оскуолалар. Күрэх кылаабынай судьуйатынан Кононов Дарха Лоокуут уола, Г.И. Чиряев аатынан оскуолатын физкультура учуутала үлэлээтэ.
Икки күннээх күрэх түмүгүнэн I миэстэ — Бүлүүтээҕи гимназия (сертификат 30 тыһ), II миэстэ — Г.И. Чиряев аатынан 1№-дээх оскуола (25 тыһ), II м. — Г.С. Донской аатынан 2 №-ээх оскуолатын спортсменнара ыллылар (20 тыһ). «Бастыҥ оонньоочу» Динара Михайлова, Павел Кириллин (улуустааҕы гимназия), «Бастыҥ кимээччи» — Виолетта Павлова, Миша Саввинов (ВСОШ I), «Бастыҥ көмүскээччи» – Надежда Гоголева, Алексей Татаринов (ВСОШ 2), «Кэскиллээх оонньооччу» — Ксения Федорова (гимназия), Леня Бенецкий (ВСОШ1), Максим Яковлев (ВСОШ1), «Бастыҥ тренер» – Ким Кимович Семенов (гимназия) анал ааты ыллылар. Бастыҥнары чиэстииргэ, үрдүккэ угуйарга биһиги спонсордарбыт элбэх харчынан көмө оҥордулар.
Бу олус суолталаах күрэх буоларын спотсмен оҕолор бары бэлиэтиилэр, кыайыылаах буолуу улахан чиэс. Билиҥҥи кэм геройа, Дима Винокуров үтүө аатын дьаныардаах үөрэххэ, спортка оҕолор, ыччаттар киэн тутта, холобур оҥосто сылдьыахтара. Бу улахан күрэҕи оскуола кэлэктиибэ (дир. Степанова В.С.), кылаас салайааччыта Федорова М.И., үрдүк таһымнаахтык тэрийэн ыыттылар.
Бу тэрээһин сүрүн спонсордарыгар уонна партнердарыгар улахан махталбытын тиэрдэбит.
Тиэкиһи суруйда — Акулина ПРОТОПОПОВА, XI кылаас,
хаартыскаҕа түһэрдилэр — Захар БОТУСОВ, Вася АРТЕМЬЕВ, VIII кылаастар
«Ориентир» медиа-киин эдэр кэрэспэдьиэннэрэ
Г.И. Чиряев аатынан Бүлүү 1 №-дээх орто оскуолата