Тохсунньу 14 күнүгэр «Өркөн» оҕону эбии үөрэхтээһин киинин тэрээһининэн ZOOM платформа нөҥүө «Косплей» тиэмэтигэр оскуола оҕолоругар аналлаах кэнпириэнсийэ буолла. Манна Бүлүү улууһуттан төрүттээх косплеер Айаал Федоров кыттыыны ылла.
Айаал отой кыратыттан хас сылын аайы маскараат куонкурсугар кыттар эбит. Кини оҕо сырыттаҕына, маскараат буолар оҕо аайыттан ирдэнэр эбит. Бастакы кыттыытын олус бу баардыы өйдүүр уонна ону наһаа сөбүлээбит эбит. Ити курдук оскуолатын бүтэрэн, армыыйаҕа сулууспалаан кэлэн баран, оҕо эрдэҕинээҕи интэриэһэ сүппэккэ, араас биллиилээх киинэ, мультик дьоруойдарын үтүктэр «косплеер» диэн буолбут.
Айаал уопсайа тоҕус уонча кэриҥэ араас дьоруой таҥастарын оҥорбут, ол таҥастарын бырааһынныктарга, араас тэрээһиннэргэ уларсар эбит. Араас матырыйаалтан оҥорбут таҥастарын быыстапкатын көрөн оҕолор сэргээтилэр, сөхтүлэр.
Быыстапкаҕа элбэх биллэр комикс дьоруойдара бааллар: Танос, Человек паук, Ракета, Железный человек, Звездные воины, Черная пантера, Гарри Поттер о.д.а. Саамай улахан көстүүмэ биэс миэтэрэлээх дракон буоларын бэлиэтээн эттэ.
Кэнпириэнсийэҕэ кыттыыны ылбыт оҕолор элбэх араас бопуруоһу ыйыттылар.
Бу билигин тохсунньу ый 31 күнүгэр дылы Дьокуускай куорат Чернышевскай уулусса 57 нүөмэрдээх дьиэтин 2 этээһигэр сарсыарда 10 ч. киэһэ 20 ч. диэри көстүүмнэрин быыстапката турарын иһитиннэрдэ. Ким баҕалаах кэлэн көрүөн-истиэн сөп.
Биллэн турар, киһиэхэ сөбүлүүр дьарыга үлэтэ буолара олус үчүгэй. Көрсүһүү түмүгэр интэриэһинэй сөбүлүүр дьарыккынан кыайа-хото тутан, бар дьон көрүүтүгэр-истиитигэр таһааран, эбии дохуот киллэриниэххэ сөп эбит диэн санааҕа кэллибит.
Аэлита ОКОЕМОВА,
Уус-Алдан улууһун оҕону эбии үөрэхтээһин пресс-киинин иитиллээччитэ.