Атырдьах ыйын 15 күнүгэр, биһиэхэ, «Энергетик» лааҕырга Дмитрий Кириллович Титов диэн Үөрэх инновационнай сайдыытын киинин салайааччыта кэлэн «Мин кимминий?» диэн тиэмэни сырдаппыта.
Мин бу кэпсэтииттэн киһи санаатын, толкуйун туһунан кэпсээбитин интэриэһиргээн иһиттим.
«Киһи санаа кулута» диэн бэргэн этиини быһаарбыта. Искэр баар санаҕыттан барыта тутулуктаах. Киһи бэйэтин санаатын үчүгэйдик сааһылаатаҕына, толкуйдуур дьоҕурун сайыннардаҕына олоххо элбэҕи ситиһэрин өйдөөтүбүт. Киһи дьон эппитинэн сылдьыбакка бэйэтэ санаалаах, толкуйдаах буолуохтаах. Санаатын сааһылан кэпсии үөрэниэхтээх. Үчүгэйи саныыр, толкуйдуур киһи – олоҕо эмиэ үчүгэй буоларын өйдөөтүм.
Дмитрий Кириллович: «Билигин сыанаҕа тахсан оҕолор иннилэригэр туран ким эмит кэпсиир кыахтаах дуо? — диэбитигэр, Айуол Новиков тахсыбыта. Доргуччу, куттаммакка, кыбыстыбакка, бэйэтин тылынан убаһа этэ киһиэхэ туох туһалааҕын туһунан кэпсээбитэ. Олус хорсун уол эбит.
Мин Айуолтан бу кэпсэтии түмүгэр туох санааҕа кэлбитин ыйыталастым — «Киһи олоҕо дьикти да буолар эбит дии санаатым. Үлэлээтэххинэ эрэ сыалгын ситиһэҕин. Киһи сатаан толкуйдаабат буоллаҕына киһи буолбат. Киһи толкуйдаах, бэйэтэ санаалаах эрэ буоллаҕына үчүгэй олоҕунан олорор» — диэн бэйэтин санаатын үллэстэр.
Биһиги бу көрсүһүүттэн бэрт элбэҕи биллибит, туһалааҕы иһиттибит.
Павлира КЫЧКИНА, VII кылаас, Кэбээйи орто оскуолата