Ахсынньы ый 20 күнүгэр оскуола оҕолоругар саамай күүтүүлээх уонна сылы түмүктүүр тэрээһин Ил Дархан Харыйата ыытылынна. Ф.Г.Охлопков аатынан Майа орто оскуолатыттан биһиги, 11 кылаас үөрэнээччилэрэ Таира Макарова уонна Виолетта Докторова, кыттыыны ыллыбыт.
Бу эрэ күн өрөспүүбүлүкэ араас муннугуттан бастыҥтан бастыҥ, Сахабыт сирин инники эрэллэрэ, сырдыгы сырсан, туйгуну тутуһар өрөспүүбүлүкэбит киэн туттар ыччата тоҕуоруһа муһуннулар. Тэрээһин саҕаланыытыгар оҕолорго уонна учууталларга араас хайысханан бэрт сэргэх уонна кэрэхсэбиллээх маастар-кылаастар, ону тэҥэ дэлэй бириистээх тургутуктар уонна күрэхтэр ыытыллыннылар. Онтон бары долгуйа кэтэспит харыйабыт үөрүүлээх чааһа арылынна. Циркэбит арената уотунан-күөһүнэн дьиримнээн, туманынан-хаарынан күөйэ тутан, хотугу дойду алыптаах эйгэтигэр, кэрэ бэйэлээх кэпсээнигэр оргууй сиэтэн киллэрэн, аанын арыйда. Бу сыл өрөспүүбүлүкэ чаҕылхай ситиһиилээх үөрэнээччилэрин уонна көхтөөх ыччатын чиэстиир өрөгөйдөөх тэрээһин олус сэргэхтик, үрдүк таһымнаахтык уонна истиҥник ааста.
Ил Дархан харыйатын кыттыылаахтарыгар ситиһиилэри, билиигэ-үөрэххэ тардыһыыны уонна өссө да маннык курдук үрдүк чыпчааллары дабайан иһэллэригэр баҕарыам этэ! Барыгытын кэлэн иһэр Саҥа дьылынан эҕэрдэлиибин!
Таира Макарова, XI кылаас үөрэнээччитэ,
Ф.Г. Охлопков аатынан Майа орто оскуолата,
«Түмэн» медиа-киин.
keskil14.ru