Таатта Игидэйигэр тэйиччиттэн үөрэнии кэмигэр куораттан тыаҕа тахса сылдьар уол баар. Кини аата Оросин Арчын. Дьокуускай куорат 7-с нүөмэрдээх оскуолатыгар үөрэнэр. Билигин эбэлээх эһэтигэр дэриэбинэҕэ кэлэн үөрэнэ олорор. Уолчаан ымыы оҥостубут баҕа санаата — улааттаҕына тыа хаһаайыстыбатынан дьарыктаныы.
Арчын Оросин үөрэҕэр үчүгэй. Сөбүлүүр предметэ элбэх: математика, суруйуу, технология, физкультураны туохтан да ордорор. Ол эрээри саха тылын ыарырҕатар. «Кыра сылдьан олоҥхолуу сылдьыбытым да, саха тыла олус уустук», — диир. Иллэҥ кэмигэр уруһуйдуурун сөбүлүүр.
Арчын — үлэһит уол. Үөрэҕин таһынан дьиэ таһынааҕы түбүгэ үгүс. Үүнээйи бүөбэйдиир, мас хайытан тэпилииссэ оһоҕун бэйэтэ оттор. «Дэриэбинэни наһаа сөбүлүүбүн. Манна куруук таһырдьа салгыҥҥа сылдьабын, велосипед тэбэбин. Кыһын куоракка таһырдьа тахсыбакка, биир дьиэҕэ хаайтаран олоробун. Куораты олох сөбүлээбэппин», — диир.
Арчын икки кус оҕотун иитэр. Кустара сымыыттыыллар, ол эрээри билигин сымыыттыыллара тохтообут. Эһэтэ Софрон Егорович — хайыһар тренерэ. Эбэтэ Розалия Васильевна эдэр сылдьан хайыһарынан утумнаахтык дьарыктаммыта. Сиэннэрэ кинилэри да батан спортка, чөл олоххо тардыһар буолуохтаах.
Уолчаан улааттаҕына фермер буолар баҕа санаалаах. «Өбүгэлэрим Оруоһуттар сайылыктарыгар Кулаадаҕа кэлэн фермердиэм этэ», — диэн бүччүм санаатын үллэстэр. Баҕа санааҕын толор, соргулаах буол, Арчын!
Арчын оҥорбут видеороликтарын көрүҥ, сыаналааҥ, лайкта туруоруҥ.
Ааптар: Варвара Ефимова
1
Молодец