Билиҥҥи балысханнаах информационнай үйэ кэмигэр оҕо баар усулуобуйаны барытын туһанан сайдыахтаах. Оҕо — биһиги инники кэскилбит, эрэлбит буолар. Кини суола аартыктаах, үөрэҕэ, салгыы улахан олоҕо ситиһиилээх буоларын туһугар бары үлэлэһиэхтээхпит.
Ол курдук, Н.Е. Мординов-Амма Аччыгыйа аатынан «Кэскил» оҕо бэчээтин кыһатын үлэһиттэрэ Хаҥалас улууһун Улахан Аан нэһилиэгэр М.Е. Васильева аатынан 2-с Малдьаҕар орто оскуолатын иһинэн «Кэскиллээх олоххо бэлэм буол» диэн тэрээһин ыыттыбыт.
«Мин нэһилиэгим инники кэскилэ» стратегическай сессияны, үөрэхтээһин контеннарын продюсера Семен Посельскай ыытта. Улахан Аан, Тиит-Арыы, Чкалов сэлиэнньэлэриттэн 5-9 кылаас оҕолоро кыттыыны ыллылар. Стратегия өйдөбүлүн тула кэпсэттилэр. Бөлөхтөрүнэн арахсан бизнес-былааннарын толкуйдаан, торумнаан көмүскээтилэр. Үлэлэригэр киирбиттэрэ: «Сильные и слабые стороны села», «Возможности и перспективы развития», «Угрозы и риски» диэн хайысхалар. Түмүккэ Тиит-Арыы оскуолатын үөрэнээччилэрэ кыайыыны ситистилэр. Ону таһынан, «Мин өрөспүүбүлүкэм аны 100 сылынан» диэн тиэмэҕэ Саха АССР төрүттэммитэ 100 аналлаах кэпсэтии ааста. Оҕолор бэйэлэрин ыра санааларын, баҕаларын, сабаҕалааһыннарын эттилэр.
Биһиги үлэлии, сыалбытын-сорукпутун толоро, кэлбит сирбит — Айыы Уолун дойдута. Александр Самсонов — сулустуу чаҕылхайдык тырымнаан ааспыт ырыаһыт. Ийэтэ Марфа Иннокентьевна Дьокуускайтан кэлэн музейга экскурсия ыытта. Кини олоҕо сүгүрүйээччилэригэр, ырыаларыгар, хоһоонноругар салҕанар.
«Малдьаҕар оскуолата — талааннар кыһалара» эбит диэн санааҕа кэллибит. Оскуола иһинэн Надежда Петровна Громова салайааччылаах медиа-киин үлэлиир эбит. Бу мантан 5 оҕо билигин наука Аччыгый академиятын иһинэн ыытыллар «Кэскил» медиа-оскуолатыгар путевка ыланнар, үөрэнэ сылдьаллар.
Икки кинигэ бэчээттээбиттэр: сэрии оҕолорун ахтыыларын хомуйан уонна учуутал М.Е. Васильева туһунан.
Тэрээһиҥҥэ эдэр кэрэспэдьиэннэр Алина Гаврильева (6 кылаас), Алина Аммосова (5 кылаас) матырыйаал хомуйдулар, эрэдээктэрбититтэн Жиркова Татьяна Ильиничнаттан интервью ыллылар. Өссө биири бэлиэтээн аастахха, Конон Шилов (9 кылаас), Андрей Егоров (8 кылаас), Мичил Матвеев (9 кылаас) диэн боксаҕа өрөспүүбүлүкэ уонна Уһук Илиҥҥи эрэгийиэн кыайыылаахтара баалларын билэн үөрэ иһиттибит. Учууталлара — оҕо спортивнай оскуолатын боксаҕа тренерэ Виктор Васильевич Пудов.
Түмүгэр Григорий Григорьевич Сысоев дириэктэрдээх М.Е. Васильева аатынан 2-с Малдьаҕар орто оскуолатын кэлэктиибэ, үөрэнээччилэрэ олус көхтөөх, саҥаны-сонуну ылынар, билиэн баҕарар эбит диэн санааланныбыт.
Эльдар САДОВНИКОВ.