Бороҕон нэһилиэгэр «Кэскил» оҕо бэчээтин кыһатын күнэ бэрт сэргэхтик буолан ааста. Хаһыат үлэһиттэрэ Мүрүтээҕи уолаттар гимназияларыгар, 1-кы нүөмэрдээх оскуолаҕа, «Өркөн» оҕо эбии дьарыгын киинигэр оҕолордуун көрсүстүлэр, маастар-кылаастары ыыттылар.
Кыайыылаахтарга өйдөбүнньүк бэлэх туттардыбыт. Кинилэр үлэлэрин сотору биһиги хаһыаппыт балаһаларыгар ааҕыаххыт.
«Чуораанчык» сурунаал сүрүннүүр эрэдээктэрэ Т.И.Жиркова «Мүрүчээнэ», «Сардаана», «Мичил» биэбэйиктэргэ сылдьан, иитээччилэр бырайыактарын, «Чуоранчык брошката» айар куонкуруһу көрдө, сыаналаата.
Аҕыс нэһилиэк иитээччилэрэ кэлэн, үөрүйэхтэрин атастастылар, үлэ торумун кэпсэттилэр. Кырачаан доҕотторбут поэт И.В.Мигалкин хоһооннорун доргуччу этэн, кини айымньыларынан чаҕылхай уруһуйдары көрдөрөн, сүргэбитин көтөхтүлэр.
Оҕо ааҕыытын туһунан төгүрүк остуол киэҥ хабааннаахтык ыытылынна. Улуус үөрэҕин салалтатыттан Д.И.Жирков, культура управлениетыттан Л.С.Павлова, Бороҕон нэһилиэгин Тумул бөһүөлэгин модельнай библиотекатын сэбиэдиссэйэ С.А.Прудецкая, улуустааҕы оҕо ыччат Дьиэ кэргэнинэн ааҕыы киинин сэбиэдиссэйэ В.А.Портнягина, кииннэммит библиотека тиһигин директора В.Н.Окоемова, «Уолан» гимназия директоры научнай үлэҕэ солбуйааччыта Н.В. Бурцева, педагогическай үлэ бэтэрээнэ Т.И.Алексеева үлэҕэ опыттарын, санааларын үлэһиннилэр. Оскуола, эбии үөрэхтээһин киинин салайааччылларын кытта бииргэ үлэлэһиигэ сөбүлэҥ түһэристибит.
Ону сэргэ оҕо ааҕыытыгар кыһаллар айар куттаах дьоммут народнай поэт И.В.Мигалкин, «Полярная звезда» сурунаал сүрүн эрэдээктэрэ В.С.Доллонов барсан, нэһилиэнньэни кытта көрсөн, дьон санаатын өрө көтөҕөн дириҥ ис хоһоонноох кэпсэтиини таһаардылар.
Уус-Алдантан төрүттээх суруналыыстар Николай Кривошапкин, Яна Байгожаева, Иван Ушницкай, Саргылаана Данилова, Данил Макеев, Жанна Леонтьева, Анна Жиркова оҕолорго хаһыат, сурунаал сурутуутун бэлэхтээтилэр. Ону сэргэ улуус баһылыга элбэх оҕолоох ыалларга сурутууга аһымал акцияны саҕалаабытыттан олус үөрдүбүт, олохтоох дьон өйүө диэн эрэнэбит. Бу күн почта үлэһитэ кэлэн, миэстэтигэр тута «Кэскил» оҕо бэчээтин кыһатын хаьыаттарыгар, сурунаалларыгар сурутуу тэрийдэ.
Мария Иванова
Фото: Василий Пак