Н.Е. Мординов-Амма Аччыгыйа аатынан «Кэскил» оҕо бэчээтин кыһата бу сылтан саҕалаан оҕолорго аналлаах видео-бырайыактары бэйэтин Интернет былаһааккатыгар keskil14.ru саайтка таһаарар буолла.
Хас биирдии рубрика бэйэтэ ыытааччылардаах уонна таһаарар эппиэтинэстээх дьоннордоох. Ыытааччы оҕолорго эрдэ кастинг буолан, баҕалаах оҕолор хас биирдии биэриилэргэ талыллыбыттара. Билиҥҥитэ ыытааччылар номнуо 10-ча биэриигэ уһулуннулар. Бу уһуллууга бастакы уопут буолан, оҕолор долгуйаллара ханна барыай, ол эрээри биһиги хас биирдии ыытааччыбытынан киэн туттабыт, бары — маладьыастар!
Оҕо көмүскэлин күнүн көрсө, бүгүн, күндү ааҕааччыларбытыгар уонна көрөөччүлэрбитигэр номнуо сэҥээриини ылбыт биэриилэри билиһиннэрэбит.
Оҕо-аймах доҕоро — «Кэскил» хаһыат быйыл 86 сааһа. Бу 2022 сыл тохсунньутуттан хас ый аайы тахсар «Бэлэм буол» саҥа сурунаал сыһыарыылаах тахсар буолла. Редакция икки биэриини Интернет саайтка сүрэхтээтэ: «Идэ» уонна «Сахалыы сөпкө саҥарыах».
«Идэ» биэриигэ ыытааччы Дьокуускай куорат 2-№дээх оскуолатын 6-в кылааһын үөрэнээччитэ Ирена Игнатьева араас идэни оҕолорго кэпсиир уонна бэйэтин араас идэҕэ холонон көрөр. Бу бүтэһик биэриигэ ыытааччы кондитер идэтин баһылаата:
Кистэл буолбатах, аныгы оҕо төрөөбүт сахатын тылынан санаатын ситэри эппэт эбэтэр сорох тыллары өйдөөбөт. Онно көмө буолар сыаллаах тылы хоһуйан этии уус-уран ньымаларын өс хоһооннорун, сомоҕо домохторун «Cахалыы сөпкө саҥарыах» рубрикаҕа ыытааччылар убайдыы-бырааттыы Эрик уонна Эльдар Максимовтар быһааран биэрэллэр.
Кыра саастаах оҕолор сөбүлээн ааҕар сурунаала «Чуораанчык» («Колокольчик») быйыл от ыйын 30 күнүгэр 35 сааһын туолар. «Чуораанчык» билигин 28 сирэйинэн, аныгы олох тэтиминэн сурунаал хартыыналара, уруһуйдара Invizion бырагыраама нөҥүө «тиллэллэр», онтон QR-код көмөтүнэн телефоҥҥар видео көрүөххүн, аудио истиэххин сөп.
Быйылгыттан keskil14.ru саайтка икки тылынан (сахалыы, нууччалыы) тахсар «ЧуорPLUS» диэн саҥа, сонун рубрика баар буолла. Ыытааччылар — саха гимназиятын 2-в кылааһын үөрэнээччитэ София Федорова, Дьокуускай куорат «Парус» оҕо уһуйаанын «Чуораанчык» бөлөх иитиллээччитэ Павел Чьямов, өрөспүүбүлүкэтээҕи лицей V кылааһын үөрэнээччитэ Артем Чупров, Дьокуускай куорат 17-№дээх оскуолатын 1-в кылааһын үөрэнээччитэ Лера Кусатова, Дьокуускай куорат 29-№-дээх оскуолатын 3-б кылааһын үөрэнээччитэ Толя Захаров өрөспүүбүлүкэ уонна дойдубут сэргэх сонунун кэпсииллэр.
Маны таһынан «Чуораанчык» («Колокольчик+») редакциялара өссө биир саҥа рубрикалара «Эрбэкэ-сэрбэкэ» буолар. Бу биэриини көрөн оҕолор оҥоһук эгэлгэтин оҥоро үөрэнэллэр, тарбахтарын эрчийэн, өйү-санааны дьарыктыыллар. Ыытааччылар — «Глобальнай үөрэхтээһин киинэ» гимназия V «в» кылааһын үөрэнээччитэ Кирилл Леонтьев,«Айыы кыһата» оскуола 1 кылааһын үөрэнээччитэ Аурелия Адамова уонна Дьокуускай куораттааҕы классическай гимназия 2-а кылааһын үөрэнээччитэ Айаал Толстяков.
«Юность Севера: Arcticideas» сурунаал — оҕолорго судургу тылынан наука туһунан кэпсиир. Сурунаал матырыйааллара нууччалыы уонна омуктуу (английскайдыы) тылынан тахсаллар. Аныгы олох тэтиминэн матырыйааллар хартыыналарын Invizion бырагыраама нөҥүө хамсатан, QR-код көмөтүнэн сурунаал иһигэр видео көрүөххэ сөп. Редакция быйылгыттан keskil14.ru саайтка үс рубриканы: «100 фактов о Якутии», «Кинотека», «Похимичим» ыытар.
Эдэр кэрэспэдьиэннэр Полина Яковлева (Дьокуускай куораттааҕы классическай гимназия 5-б кылааһын үөрэнээччитэ) и Дима Семенов (РДШ) Сахабыт сирин историческай чахчыларын, пааматынньыктарын, бэлиэ сирдэрин, култууратын уонна үгэһин туһунан сырдаталлар. Бу бырайыак «Россия — моя история» историческай паарка, сүрүннээн методист Виктор Борисов, көмөтүнэн уонна Арассыыйатааҕы оҕо хамсааһынын Саха сиринээҕи салаатын (Нюргуяна Владимировна Макарова) өйөбүлүнэн тахсар.
«Похимичим» рубрикаҕа ыытааччылар Уйгууна уонна Бэлик араас эксперименнэри оҥорон уонна боруобалаан көрөллөр. Олус интэриэһинэй!
«Кинотека» биэриигэ кинознаток Арина Атласова араас киинэни, сериаллары, мультиктары ырытар уонна бастыҥнары көрөргө сүбэлиир. Уонна хас биэрии аайы көрөөччүлэргэ минньигэс бэлэх оонньонор, онон саамай болҕомтолоох көрөөччүнү ыытааччы хайаан да бэлиэтиир үгэстээх.
Онтон астыырын сөбүлүүр оҕолорго аналлаах биһиги саайпытыгүар keskil14.ru «Таҥсык» биэрии тахсар. Асчыт уолбут Айсен Неустроев, Дьокуускай куорат 31 №-дээх орто оскуолатын 4 кылааһын үөрэнээччитэ, судургу, хайа баҕарар оҕо астыан сөптөөх, бүлүүдэлэрин астаан көрдөрөр.
Маны таһынан саайтка «Дьулаан» кутталлаах анимационнай подкаст тахсар буолла. Хас биирдии серия олус кутталлаах, онон «ужастиктары» cөбүлээччилэргэ астык биэрии.
Бу биэриилэри барытын биһиги саайпытыгар keskil14.ru толору көрүөххүтүн сөп.
Инникитин өссө элбэх интэриэһинэй биэриилэр баар буолуохтара, онон, оҕолоор, биһиги таһаарар биэриилэрбитин көтүппэккэ көрөр буолуҥ!
ВК страницабытыгар суруттарыҥ https://vk.com/keskilmedia
«Кэскиллиин» бииргэ буол!
Кэскиллээх олоххо бэлэм буол!
keskil14.ru