Балаҕан ыйын 29 күнүгэр «Кэскил» хаһыат эрэдээксийэтэ, учууталлар, бибилэтиэкэ үлэһиттэрэ, эдкорпост салайааччылара «Кэскил» оҕо хаһыатын кытары ыкса ситимнээх эйгэни тэрийсэ, сүбэ-соргу истиһэ, уопут атастаһа, ZOOM сэһэргэһии түһүлгэтигэр көрүстүлэр.
Көрсүһүүгэ оҕо ааҕар эйгэтин тэрийиигэ, хаһыаттарга, сурунаалларга сурутууну көҕүлээһин тула кэпсэтии ыытыллынна. Учууталлар уонна бибилэтиэкэ үлэһиттэрэ «Кэскил» хаһыаты бэйэлэрин уруоктарыгар, куруһуоктарыгар хайдах туһаналларын кэпсээтилэр.
«Төрүччү», «Мин республикам 100 сылынан…», «Саха саарыннарын суолларынан — Кэскиллиин экспедиция» уо.д.а. «Кэскил» хаһыат улахан суолталаах бырайыактарын, сүрүн эрэдээктэр Татьяна Ильинична Жиркова, билиһиннэрдэ уонна хас биирдии оҕо, дьиэ кэргэн, оскуола бу бырайыактарга кыттыан наадатын тоһоҕолоон эттэ.
Көрсүһүү кыттааччылара улуустарынан айар-суруйар оҕолорго аналлаах семинар, бибилэтиэкэлэргэ «Кэскил» хаһыаты ырытар, хаһыат тула кэпсэтэр уруоктары тэрийэргэ уонна «Эбэм, эһэм күндү бэлэҕэ» диэн сурутуу акциятын ыытарга сүбэлэстилэр. Уопут атастаһыы, идея үллэстии тэрээһиннэрин ыйын ахсын ыытарга былааннаатылар.