«Кэскил» оҕо өрөспүүбүлүкэтээҕи хаһыатын төрөөбүт күнүнэн Боронук орто оскуолатыгар ыам ыйын 14 күнүгэр уоскулаҥ кэмигэр араас тэрээһиннэргэ кыттынныбыт.
Ол курдук, кылаастарынан «Кэскил» хаһыаттан туһалаах сүбэлэри, эбэтэр, сөбүлүүр рубрикалары билиһиннэрэр «Сүбэ холбуката» түһүмэххэ II-VIII кылаас оҕолоро көхтөөхтүк кытыннылар. II кылаастан Айтал Сыромятников хаһыаты оҕолор төһө болҕомтолоохтук ааҕалларын тургутар ребустары, криптограммалары таайтарда.
IV кылаастар “Уоскулаҥтан” кроссворд таайтардылар. V кылаастар “Бэлэм буол” сурунаалы билиһиннэрдилэр. VI кылаас оҕолоро “Эрчими”, “Уоланы” кэпсээтилэр. “Таҥсык”, “Арай биирдэ” балаһалары ахсыстар рекламалаан кэпсээтилэр.
«Хардыылаа, Оонньоо, Толкуйдаа» диэн хаһыат оонньууларынан күрэҕи II кылаастан Айтал Сыромятников көҕүлээтэ.
«Тэтимнээх» рубрикаҕа сыһыаран, Л.Ю. Заборовская Шаттл диэн аныгы тэтимнээх үҥкүүнү үөрэттэ. Итиэннэ XI кылаас үөрэнээччитэ Катя Соловьевалыын CRIP WALK хамсаныытын көрдөрдүлэр.
«Айыына» рубрикаҕа Г.В. Горохова, С.Н. Горохова салалталарынан пластик бытыылкатынан скворечник оҥордулар.
Билигин сыл иккис аҥаарыгар сурутуу үлэтин салгыы ыытабыт. Ити курдук, тапталлаах хаһыаппыт араас балаһатын олоххо туһанан, бу күнү көхтөөхтүк атааран, “Бэлэм буол”-“Кэскил” хаһыат төрөөбүт күнүн үөрүүлээхтик бэлиэтээтибит.
Наташа СТЕПАНОВА, VIII кылаас үөрэнээччитэ, учуутал А.Т. Стручкова,
Боронук орто оскуолата, Үөһээ Дьааҥы.